Shillong, Oct 25: Meghalaya a•doko sak lak gnimangni manderang COVID-19-ni gnigipa tikako su•ani ong•engahachim indiba bang•bata manderangan ia gnigipa tikako su•e ra•tokkujaenga ine Sombar salo a•dokni Joint Secretary aro National Health Mission (NHM)-ni Mission Director Ram Kumar parakataha.

Kumar-ni parakatani gitade, Meghalaya a•doko gnigipa changna COVID giproroani somoio bang•bata manderangan May, June aro July jarangode tikarangko su•e ra•tokahachim indiba August jani bon•angachibara sabisini giproroani adita komiangahaon da•o gnigipa tikakode bang•bata manderangan su•e ra•skakujaenga.

Meghalaya a•doko bang•a manderangan gnigipa tikako su•e ra•na gisiko nangjaengani gimin dingtangmancha ja•kurangko de•chakatchina gita sorkari ge•etaniko on•ataha ineba NHM-ni Mission Director parakataha.

Iani bidingo Health department, songbadrangoba manderangna u•iatnirangko on•manahachim ine janapatengon, ia COVID-ni tikako su•srangkugijagiparangko aro gnigipa tikako su•na nangkuenggiparangko ua re•bae su•e ra•china gita didiataha.

Da•o dipet Meghalaya a•doko COVID-ni skanggipa tikako gimik sak 10,95,389 aro gnigipa tikakoba gimik sak 5,99,876 manderangde su•e ra•tokmanahachim.