SHILLONG, NOV 27: Meghalaya SSA Schools Association-ni (MSSASA) adita sak skigiparang SSA school-rango gital niamrangko ra•gatani aro dormaharangko on•nani bidingo kamrangko ka•anirangko somoi gita matchotna aro uarangko ra•gatna ine Education Minister Lakhmen Rymbui-ni dakchakaniko am•aha.
“SSA school-rango gital niamrangko ra•gatna ja•ku de•anirangna chinga a•dok sorkariko mitela. Re•baenggipa bilsio schoolrangko a•bachengattaina skang pilak kamrangko matchotatchina chinga mol•molaha aro sorkari an•tangni man•a dipet kamrangko ka•anggen ine minister chingna ku•chake on•angaha,” ine Bristibar salo tom•ani ja•mano MSSASA-ni president Aristotle C Rymbui kobor ra•timgiparangna parakataha.
“Una agreba, SSA school-rango gital niamrangko ra•gataniko dakna somoi nangnaba donga maina sorkari dingtang dingtang dolrang baksa mongsongbate missionary aro private school-rang baksa agangrikanirangko dakna nanggen,” ine ua agandapaha.
Unbaksana, kamoni neng•takgimin SSA-ni skigiparangko government school-rango kamrangna galatna man•na gita uamangna one-time relaxation-ko on•china association-ni manderang sorkariko mol•molaha.
“Iani bidingo, pilak nanggipa department-rang jekai personnel aro law department-rang baksa nigrike chanchirimanirangko dakanggen ine minister ku•chake on•angaha. Ia minggni department-rang baksa agangrikanirangko dakani ja•mano, association-ni manderangna u•iataniko dakgen,” ine Rymbai aganangkuaha.
Teachers’ Eligibility Test-ni (TET) bidingo janapon, porikkako ong•atna nanggipa kamrangko tarisoaha indiba in-service skigiparangni bidingo talatanirangko sengkuenga ine minister u•iataha.
“TET-ko ong•atna pilak kamrangkon education department ka•soaha indiba mongsonggipa sing•anide da•o skigipani kamrangko ka•giparang ia TET-ko sena man•ama man•jawa uasa ong•enga ine minister association-ni manderangna aganataha. Uni gimin re•baenggipa antio minister, ministry of education aro NCTE-ni dilgiparangko grongenba in-service skigiparangni porikka seani bidingo talatanirangko dakchina agangen,” ine Rymbai talataha
Skigiparang badita ru•ute kam ka•engahachim, uno pangchake sorkari uamangko porikka sena on•anirangko dakna skenga ineba ua agandapaha.
SSA-ni skigiparangni dormaharangni bidingo sorkari Krismas-na skang u•iatgen aro ian April 1, 2026-oni dipet ong•anggen ine minister parakataha.
“SSA-ni skigiparangni kam ka•ani bilsirangni bidingo data-ko chimonganina dakna nanggnirangko SDSEO-rangna watataha aro ia kamrang ru•utgija salrangni gisepon matchotgen ine chinga ka•donga,” ine Rymbai aganaha.
Na·simang iakoba nina man·gen:
Na·simang iakoba poraina man·gen: Health & Infra Project-rangko ta·rake matchotatchina M’laya Estimate Committee didia
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
