Shillong, Dec 19: Re·anggipa November 22 tariko Mukroh-o a·sel ong·ani ja·man Mukroh songni manderangni Assam Beat Office-ko so·chipani ja·manoba apsan biapon gital dake nokko riktaipilani bidingo Meghalaya a·dokni skotong minister baksa agangrikna gita songni dilgiparang baksana Khasi Students’ Union (KSU) dol Sombar salo skotong ministerko grongna Shillong-ona re·batokaha.

Iani bidingo KSU-ni general secretary Donald Thabah-ni koborna talatangani gita, skotong ministerko uamangni grongna re·baanira, Mukroh songni ning·ao rikgipa Assam Beat Office nokko Assam sorkari baksa agangrike ra·galatchina gita a·dok sorkario mol·molna miksongani ong·a ine talataha.

“Ia mamlako skotong ministerna u·iatna gita miksongani gnang chinga re·bahachim indiba chinga uko grongna man·jaha, ine Donald Thabah aganaha.

Thabah-ni aganatani gita, adita salrangna skang Mukroh songona uamangni wenangao skango rikgipa nokko so·ani ja·man apsan biapon Assam sorkari, skangna bate nambate Beat House-ko rikpiltaiataniko nikna man·aha aro uano official-rangba donga ine janapatan baksa, Assam sorkari ia Beat Office-ko Mukroh songni ning·o niam grisa rikataha ineba KSU-ni dilgipa koborna agandapataha.