Shillong, Nov 25: Meghalaya a•dokni gitcham chief minister Dr Mukul Sangma baksana Congress dolni gipin sak 11 MLA-rang, All India Trinamool Congress (AITMC)-o napangaha ine Bristibar salo parakataha.
Mukul Sangma baksa AITMC-o napanggipa Congress dolni mitam MLA-rangara, Charles Pyngrope, Hima Shangpliang, George Lyngdoh aro Shitlang Pale ong•achim.
Iani bidingo kobor ra•timgiparangna talataniko on•angengon, a•dokko aro a•songko chel•chakna an•tangtangni daitoko chu•sokatna gitasa uamang AITMC-o napangaha ine Bristibar salo, Sangma parakataha. Meghalaya a•doko aro a•songo ong•enggipa obostarangko chanchiesa uamang ia ja•kuko de•aha ineba Sangma parakataha.
Sangma-ni aganani gitade, uamang manderangni nangnikanirangko ma•sie ra•na jotton ka•on, a•songko nambate chalaina gita uamang dingtang political dolko nangnikenga ine uamang ma•sina man•aha.
A•songo mongsonggipa opposition dol ong•eba INC, kamtangko chu•sokatna man•jaenga ineba Sangma parakataha.
A•dokko aro a•songko name nirokna gita cholrangko sandianio uamang ia ja•kuko de•na draatako man•aha ineba Sangma aganaha.
“TMC-ni dilgipa Prashant Kishore aro anga a•dokni namgnina apsan miksonganirang donga,” ineba ua aganaha.
Dilgiparang ong•e uamang an•tangtangni u•i-ma•siani gita kamrangko ka•na cholko man•na gitasa uamang ia ja•kuko de•aha ine sakgipin MLA Charles Pyngrope parakatskaaha.
Prashant Kishore baksa tom•e chanchirimanio uamang a•songna nambate dangdike on•angkuna aro ong•gija miksongani donggipa dolrangko warachakangna gita tik ka•aha ineba Pyngrope aganaha.
Uamang an•tangtangko dilna gita dingtangmancha dilgipa dolko bikotna man•gen aro uamang an•tangtangni u•i-ma•sianirangchi an•tangtangko dilna man•gen ineba ua an•tangni ka•dongchakenganiko parakangaha.
