Shillong, Feb 3: Gitcham Congress sorkarini somoio, a•dokni manderangko bil jakkalesa sason ka•na jotton ka•aha ine Sukrobar salo, Meghalaya a•dokni Chief Minister aro National People’s Party (NPP)-ni national president Conrad K Sangma, a•dokni gitcham chief minister aro Opposition TMC-ni dilgipa Mukul Sangma-ko matnangataha.
Sukrobar salo, NPP-ni election manifesto-ko oprakna gita jinma tom•bimonganiko Jowai-o ong•atanio ua jinmana aganprakengon, gitcham Congress sorkarini somoio Mukul Sangma, silchidarerangko aro sipai dolrangko jakkale manderangko sason ka•ahani giminsa da•alo NPP sorkariko ‘bilgria’ ine aganenga indiba bil jakkale sason ka•aniko uamang bilaknikenga ong•ode uko uamang raken jegalgen ine Sangma parakataha.
Mukul Sangma an•tangan ‘bilgriani’ giminsa a•doko songdongenggipa dosgri manderangni kosako bil jakkale sason ka•na jotton ka•aha ineba NPP-ni national president parakataha.
Dilgipa ong•ode pangnan an•tangni manderangko ka•saesa jakkalna nanga ineba ua aganaha.
An•tangko ‘bilgria’ ine matnanggiparangna aganchakaniko on•angkuengon, “Bilgria aro nom•e mesokanio pangnan dingtanggrikani donga ine anga uamangna talataniko on•na ska. Chinga pangnan kamrangko ka•anio manderango sing•cheng sanchenge aro manderang baksa agangrikchengesa ka•a aro ian chinga bilgria ine mesokani ong•ja indiba chingo manderangna ka•saani donganikosa mesoka. Chingni nom•e on•aniko bilgria ine ma•sisretjachina maina chingo bilko jakkale sason ka•na skaniba dongja. Chinga manderangna nom•e on•engnaba gnang indiba chinga pangnan manderangko knachaka,” ine Sangma aganaha.
TMC dolara West Bengal a•dokoni re•bagipa dolsa ong•a ine ia tom•anio Chief Minister, manderangna gisik ra•atpiltaianiko on•angengon, TMC-ni dilgipa Mamata Banerjee an•tangan, West Bengal a•dokde a•doktangni party donga aro uamangna gipin national party-rang re•bae a•dokko sason ka•ani bidingo skina nangjawa ine aganahachim ine Sangma parakataha.
Apsan daken, TMC-ba Meghalaya a•dokode gipin biapni party-sa ong•enga aro Meghalaya a•dokni manderangba an•tangtangko nirokna ma•sigiparang ong•a ine Sangma aganaha.
Ia Assembly election-o TMC, damgni ba damgittamna bate seat-rangko chena man•jawa ineba Sangma parakataha.
