Guwahati, September 21: Assam Unit Trinamool Congress(TMC) Prime Minister Narendra Modi-ni atchiani salko maniani bak gita gansang rike jegalanikoba dakangaha.
Assam TMC unit-ni President Ripun Bora-ni Prime Minister Narendra Modi-ni mikkang-ko atchrak tarigipako gane jegalaniko nike kobor ra·timgiparangni sing·on, chinga Narendra Modi-ni kosakode jegalja aro uni an·sengbaljoke donganiko aro tangbanganikon nangnika indiba sing·doanide sal 15-na kingking uni atchiani salko manianiara mai miksongani aro ian an·tangna maiba man·gnina dakanisan ong·jaengama ine Bora sing·doaha.
Ma·mongo BJP sorkari rikaoni da·alona a·songni obostarang namjabatroroaniko nikenga. Songdonggiparang uamangni chanchianiko ba nangnikaniko ku·rang on·nan man·jaha. Modi batanggimin 2014 bilsionin Assam a·dokna mikkang niteaniko aro Bangladesh-oni niam gri napdrabagiparangko rikgalgen ine ku·rachaka indiba da·alonaba saksakoba rikgalakon nikujaenga. Unigimin chinga ming 8 sing·dona nanganirangko sing·gen, Assam a·dokni namgnina miksonganiosa da·alo jegalaniko mesokenga ine Bora kobor ra·timgiparango talatdapaha.
