Williamnagar, July 28: July 28 tariko National Justice Day ba A⋅songni kakket bichalni sal ine done manianio Williamnagar Dawagre ni Loyola Secondary School-oba Father Stan Swamy-ko dosi potdrake ajoto chipate mangkimaona sokatahanina aro uko gisik ra⋅nagita mombati so⋅e bianiko dakangjolaha.
Tom⋅anio Loyola School ni father Melwyn rimchaksoani kattarangko aganengon, father Swamy sagini aganggipa katta ‘anga jrip nie dongaigipa ong⋅jawa, je obostako chagrongnaba anga taria’ iako agane gisik ra⋅atan baksa an⋅chingba father Stan-ko mandera⋅e uni pilak ja⋅kurangko ripingna aro tol⋅drae dosigri manderangko ajoto chipanina ku⋅rang on⋅giparang ong⋅na ine Father Melywn jinmana aganchengaha.
Tom⋅anio mongsonggipa ong⋅e aganggipa Loyola College ni father Principal Sunny Augustine, National Jusctice Day-ko maniengon Father Stan-ko uni India a⋅songni manderangna mongsongbate che⋅epako man⋅gipa Adivasi jatrangni jakgitelanina aro kakket bichalna kam ka⋅anina uko mande ra⋅na krachongmota ine aganaha.
A⋅songo kakketgijani, an⋅chi pari nikani, apsangrik ong⋅gijani aro jakgitelgijani gisepo father Swamyni agangipa kattarang gita an⋅ching jrip niari donggipa ong⋅na nangjawa. Da⋅alo bang⋅a dosi gri manderangko potdrae patoko chipatako man⋅giparangko jakgitel watchina chinga Indiani ma⋅mong sorkariko dabienga. Father Swamy-ni siangani ianon bon⋅aijawa indiba ian kakket bichalna re⋅mikkangna mangrakbatatanisa ong⋅enga ineba Father Sunny aganaha. Bon⋅kame Rabindranath Tagore-ni aganggipa katta ‘ Salgini Jakgitelani Chacha oh Apa chingni A⋅songkoba mikgaoatbo’ ine agangipako ra⋅e Isolni bil aro an⋅ching manderangni dingchike ku⋅mongani baksa kakket bichalna re⋅chakatna ine Father Sunny agane uni agananiko matchotaha.
Tom⋅aniko matchotatna Fr. Yan ni jakchi Isol-o bi⋅e aro India a⋅songni ni niam bidikni mongsonggipa janapchenganiko jilma poraie, Fr. Swamy ni noksa mikkango pul bibalrangko don⋅e tom⋅aniko matchotataha.
