Shillong, March 15: A·dokni koelarangko niam gri salsrukangani bidingo da·odipet gimik-gimang ming 250 mamlarangko a·doko segataha ine Meghalaya-ni skotong minister Pa Conrad Sangma, Sombar salo u·iataha.
Assembly-o sing·anina aganchakengon, Chinga iandakgipa ong·gija kamko ka·na on·jawa ine Assembly-o ka·dongataniko on·enba, ia mamlarangko namedake sandirokataniko dakenga ine u·iatan baksa sorkari ia kamrangko namrenge ra·jaenga ineba skotong minister aganangkuaha.
“A·doko niam pe·e koela cho·atanirang dongjana gita Meghalaya sorkari niam gri koela cho·atanirangko champengatani dingtang dintang ja·kurangko de·ataha ine talatenba, re·anggipa baditaba jarangni gisepo sak 95 manderangko rim·aha aro ming 146 mamlarango charge sheet-rangko on·aha,” ineba Pa Sangma taldapataha.
“Meghalaya Democratic Alliance (MDA) sorkarini batanggimin 2018 bilsio sasonni bilko jako ra·chakataonin, a·ningni gamko bikotanirangko nirokatani niam Mines & Minerals (Development and Regulation)-MMDR Act-ko chinga a·doko ra·gatataha,” ine ua aganaha.
Da·omiting tangka-paisa chamani bidingo Assembly-o tom·aniko ong·atenggipao Congress dolni MLA Pa Mohendro Rapsang-ni Sombar salo sing·anina aganchakanio, “A·dok sorkarini u·iatanirango pangchake, “Unstarred Question No. 656” na ma·mong sorkari Rajya Sabha-o aganchakangaha,” ineba skotong minister talataha.
Niam gri koela cho·ataniko champengna sorkarini kam ka·atanirangko janapatengon, “MMDR Act, 1957-ni section 22 -ni ning·o bil on·aniko jakkale, niamni ning·o sastiko man·na kragipa ong·gija kamrangna kacharini mikkkango see-jote on·achi nalis ka·na gita officerrangna bilko on·aha,” ine Pa Sangma janapatkuaha.
National Green Tribunal-ni champengatgipa niamko raken maniatchina aro niam gri koela cho·atanirangko nirokatchina gita Deputy Commissioner-rangna aro Superintendent of Police-na rakgipa agan-ge·etanirangkoba on·aha ine skotong minister, Assembly-na ka·dongatanikoba on·angaha.
Niam gri koela cho·atanirangko dontongchina gita a·dok sorkari changni-chang ge·etanirangko on·enga ine janapatan baksa, Mines and Minerals (Development & Regulation) Act, 1957-ni ning·o dongimin niamrangkoba a·dok sorkari ra·gatataha aro niam gri koela cho·anio niamni Section 21-ni ning·o adita mamlarangkoba segatangaha ine Pa Sangma u·iatkuaha.
“Beng·gimin niamko pe·e cho·srukatenggipa jeba a·ningni gamrangko bikotani ba uarangko salanganiko man·chape cho·na jakkalgipa bosturang aro garirangko sekchina gita MMDR Act, 1957-ni section 21(4)o on·gimin niamni ning·o a·dok sorkari iana dingtangmancha bil on·gimin officerrangna u·iatanikoba on·aha,” ine skotong minister agandapataha.
