Williamnagar, Jan 28: Ong·gija kamrangko nirikkina donata man·gipa East Garo Hills a·jani dolsa police, mijal Butbar attamchibara 2:30 bajimango koela gape salenggipa gari trak bolgniko Rongkhem jolo chagronge gariko salenggipa driver-rangoniko nangchongmotgipa lekkarangko police-ni sandion uamangni mesokna man·tokjahani gimin ua trak bolgniko rama tong·saon sekrika baksana dongimin niamrangko pe·e koelarangko gate salenganina uamangko rim·aha ine ja·pangoniko koborrangko man·soaha.
Iani bidingo ja·pangoni koborna seachi u·iatanio, iako name ning·tubate sandidapaniko dakangna gita aro beng·gimin niamrangko pe·ani gimin uamangni kosako kragipa niamrango pangchake East Garo Hills-ni Williamnagar Police station-o ge·sa mamilako segatangaha. Indake, ua sekgimin garirangko da·o Chiading police station-o rakkie donenga ineba koborna u·iatdapaha.
Indake ong·engon, a·doko koela cho·ani aro salaniko National Green Tribunal (NGT)ni champengatgimin niamrangko pe·e koelarangko gate salenganiko mijalo rim·a man·aniara adita salrangna skang niam gri koelarangko cho·enggipa sakdok manderangni Jaintia Hills-o a·sel ong·e siangani koborrang parak ong·ani ja·man ong·aha ine nikatna man·gen.
