Shillong, Sept 10: NPP-chi dilenggipa MDA sorkari, a·doko songdongenggipa manderangni namgnina kamko ka·jaenga ine Sukrobar salo Opposition dolni dilgipa Mukul Sangma parakataha.
A·doko so·sojengjeng ong·anirang batroroenga ine matnangatengon, a·bachengonin a·dok sorkari, niam retirangko rakkianio chu·sokgipa ong·na man·jaha ine Sangma parakataha.
A·doko niam retirangko rakkina man·jaenga ine sorkariko matnangatengon, dingtang dingtang namroro silroroani program-rangko chu·sokataniosan ong·aigija sima arirango so·sojengjeng ong·anirangko namatna kam ka·anio aro a·doko niam retirangko rakkina kam ka·anioba MDA sorkari chu·sokgipa ong·jaha ine Sangma parakataha.
Sorkari donggenchimoba kamrangde dongjaenga ine janapatengon, ia pilakan sorkarini kamtango gisik nanggijani a·selsa ong·enga ine Opposition dolko dilgipa parakataha.
Indake ong·engon, da·o ong·enggipa Autumn Session-o Assembly-ni Speaker Metbah Lyngdoh-ko kamoniko ra·galna gita chanchirimaniko ra·gatahaon Speaker-ko ra·galna resolution ra·ani bidingo Opposition dol talataniko on·gen ineba Mukul Sangma parakataha.
Assembly-ni Speaker-ko ra·galna gita Opposition dolni ja·ku de·engania a·dokna aro a·doko songdongenggipa manderangni namgninasa ong·enga ineba Sangma parakataha.
