Shillong, Nov 20: National People’s Party (NPP)-ni dilgiparang a·bachengonin Citizenship Amendment Act (CAA)-ko jegaltokaha aro NPP-ni gisepo darangba ia Act-na chakpaani dongja ine Sonibar salo, NPP-ni state president WR Kharlukhi talataniko on·angaha.
“NPP-ni gisepo darangba dingtange chanchia dongja. Iani bidingo Agatha maikoba aganengnaba gnang indiba uan dolni gitade aganenga ong·ja. Anga an·tangan a·doko NPP-ni president ong·e iani gimin name ma·sia. Chinga a·bachengonin CAA-na chakpaani dongja,” ine Dr Kharlukhi, kobor ra·timgiparangna parakataha.
Parliament-o Tura-ni MP Agatha Sangma, CAA-na chakpaaniko parakahani gimin CAA-ni bidingo NPP-ni dilgiparang meligriktokjaengama ine sing·anina ua ia kattarangko aganchakaha.
Salgro salaram a·dokrangni chief minister-rang baksa Meghalaya a·dokni Chief Minister Conrad K Sangma tom·e chanchirimani a·selsa a·doko CAA-ko ra·gatgnioniko champengatna man·aha ineba Dr Kharlukhi gisik ra·atpilaniko on·angaha.
Meghalaya a·doko CAA-ko chu·gimik ra·gatgnioniko champengna gita NPP mai ja·kurangko de·samsoenga ine sing·on, “Iako champengna gita chinga rakbee kamko ka·enga indiba Delhi-o iako knachakna gitade salgro salaram jolo songdongenggipa manderangni bilake ku·rang on·aniko nangenga. Meghalaya a·doko bilona re·bana gita ching 1999 bilsioni 2018 bilsiona somoiko nangaha indiba iako chu·sokgipa ong·atna chinga jotton ka·angkugen,” ine NPP-ni state president parakataha.
