New Delhi, May 22: Sombar salo, National People’s Party (NPP)-ni ning•o donggipa National Committee-ni tom•aniko New Delhi-ni Constitution Club of India-o ong•atangaha aro ia tom•aniko NPP-ni national president aro Meghalaya a•dokni Chief Minister Conrad K Sangma dilangaha.
Ia tom•anio Assam, Arunachal Pradesh, Manipur, Mizoram, Chattisgarh, Jharkhand, Karnataka, Gujarat aro Uttar Pradesh a•dokrango donggipa NPP-ni membor-rang bakko ra•angtokaha.
Ia tom•anio, re•baenggipa bilsini Lok Sabha election-na aro Mizoram a•dokni Assembly election-na tarisamsoanirangko, a•doktangtangni dilgiparang, agan-talate on•angaha aro Meghalaya, Nagaland baksana Manipur a•doko gital seoka man•gipa NPP-ni MLA-rangnaba mande ra•pilskaaniko dakangjolaha.
Party Constitution-ni Article 23 (V)-o pangchake, ia tom•anio NPP-ni national treasurer James K Sangma, 2023-24 bilsina tarigimin NPP-ni budget-ko mesoke on•angan baksana accounts-ni annual audited statement-koba party membor-rangna mesoke on•angaha.
A•doktangtangni progress report-rangko state president-rang mesoke on•angskaaha.
Ia tom•anio dingtangmancha Manipur a•doko ong•enggipa obostanaba resolution-ko ra•e, Manipur a•doko tom•tomaniko ra•bapilna gita pilak jatrang baksa bakrime kamko ka•na NPP-ni dilgiparang ku•rachakangaha.
NPP-ni national treasurer James K Sangma-ko national general secretary (organization)-ona aro Arunachal Pradesh a•dokni in-charge-ona ra•doataniko ia tom•anio NPP-ni national president Conrad K Sangma parakataha. Mizoram a•doko Assembly election-ko ong•atna siengani gimin Meghalaya a•dokni Cabinet Minister Dr M Ampareen Lyngdoh-ko Manipur a•dokni state in-charge dake ia tom•anio donatskaaha.
