Baghmara, Feb 8: Re·anggipa Sonibar attamni 6 bajimango gari a·sel ong·e bilongbee saknaa man·gipa mande sakgniko South Garo Hills district-ni ning·o ga·akgipa Pathargittim PHC-ona ra·angani somoio, PHC-ni doctor sakgni Laster Sangma aro Chuangka D Shira-maangni kamtango donggija chutti ra·ani gimin Garo Students Union (GSU), Nongalbibra Regional Unit uamangni kosako jegale lekka sedoaha.
Iani bidingo Union-ni padot Sewa S. Marak-ni koborna u·iatani gita, Pathargittim PHC-ni doctor sakgnian apsan somoio chutti ra·dime indakgipa tanggitik nangani somoio kamtangko ka·gija dongenga ine janapataha.
Dr-rang kamtangko tik ong·e ka·jani a·sel obostao ga·akgipa saksa, janggitangko gimaatna nangaha aro sakgipin obosta namgijao ga·ake uko ja·mano Williamnagar Civil Hospital-o ra·ange sana-bananiko dakatenga ineba ua u·iataha.
U·iatani gita, Bolero Camper gari bolsa ua somoio NH-62 soroksamo donggipa Pathargittim PHC samba jolo a·sel ong·aha. A·selo ga·akgiparangara Nongalbibra-ni bilsi 60 ong·gipa Bitash K Sangma aro Mahadeo-ni bilsi 65 ong·gipa Jabi M Sangma ine ma·sina man·aha, indake uamangko jolni manderang nikeming bakan PHC-ona ra·angaha, indiba ua somoio PHC-ni doctor sakgnian dongtokjachim.
Supreme Court-ni niam gita, doctor-rang PHC-o konta 24-na sal-wal kamtangko ka·na nangachim, indiba indake nanggitikani somoio doctor-rang kamtangko ka·gija dongskaenga aro apsan somoio doctor sakgni maikai chutti ra·dimna man·na ine GSU sing·doangaha.
“A·selo ga·akgipa mande sakgniko jensomoio chinga hospital-ona ra·angon, Pathargittim PHC-ni doctor sakgnian chutti ra·ani gimin chinga aiao inmanaha. A·selo ga·akgipa manderang namen jokkom ong·aha, indiba doctor-an dongjaode sawa sankugen” ineba union-ni dilgipa suk ong·gijaniko parakaha.
Saknagipa manderangko ra·angna gita Pathargittim PHC-o ambulance gari dongjani a·sel ru·uta somoini ja·manosa 108-na kobor on·ataha. Indake a·selo ga·akgiparangko Williamnagar Civil Hospital-ona ra·angna konta gittam nangaha jeni a·selo saksani janggi gimaaona sokaha ine agane, uamangko gong·rake sanna man·genchimode indaka obostao ga·akjawachim ineba GSU-ni dilgipa suk ong·jae janapataha.
Ia obostani bidingo GSU, South Garo Hills-ni a·jani Deputy Commissioner aro District Medical & Health Officer-na da·al Sombaro lekka sedoe badi ka·angaha ine GSU-ni padot koborna u·iatjolaha.
