Guwahati, Sept 13: Sonibar salo, Prime Minister Narendra Modi tangka kror 9,000-ni projectrangko Mizoram-o oprake on·angaha aro skanggipa changna Aizawl-ko India-ni railway map-o napatanichi gisik ra·beani sal ong·aha ine aganaha.
Balwa-mikkani a·sel Lengpui Airport-o jachange, videoconference-chi agangrikatengon, Prime Minister Mizo-rangni bebera·anio dal·batgipa Isol, Pathian-na bamgopaha, aro manderang baksa mikkangchongchong dongjagenchimoba uamangni ka·saani aro mande ra·aniko man·aha ine aganaha.
Ia tom·anio Mizoram-ni Governor V K Singh, a·dokni skotong minister Laduhoma aro Union Minister Ashwini Vaishnaw bak ra·angaha.
Ia tom·bimonganio kror ₹8,070-ni Bairabi–Sairang rail line-ko oprake, Mizoram-ni skotongko Indian Railways network baksa nangdimeataha. Ge-45 tunnel-rang, dam-55 mongsonggipa dolongrang aro dam-88 chonchongipa dolongrangni kosako rike, ian daka-rikanio nambee chu·sokani ong·a ine manderang agantokaha. Ia project-o dolong No. 196-an 104 metre-rangona kingking chudoe, Mizoram-o rel rama-ni changrobatgipa krong ong·enga aro ian Delhi-ni Qutb Minar-na bateba changrobata. Modi ge-3 express train-rangkoba nirike watataniko dakaha, aro uarangoni ge·sara Mizoram-oni Delhi-ona re·angchenggipa Rajdhani Express ong·a, aro unbaksana Kolkata aro Guwahati-onaba gital rel-rangko wataha.
“Ian rel-ko watanisan ong·aija indiba dingtanganiko ra·baani ramaba ong·a,” ine agane, Mizoram-ni game cha·giparang, bading-chiwalgiparang, chatro-chatrirang aro sagiparang da·ode nambata biaprang, antidamrang, poraiani cholrang aro sanna-banani cholrangko man·gnok ine Modi parakataha. Ia gital ramako oe on·anichi tourism, transport aro hospitality manderangna janggi tangani cholrang nakatgnok ineba ua agandapaha.
Rel-rangna agreba, Prime Minister mongsonggipa projectrangnaba pangchakani ro·ongko songaha, jekai 45-km Aizawl Bypass, jean tangka kror 500-ni project ongva aro iako skotong songjinmao changketaniko komiatna aro Salgipeng-ni a·jarangoni songrebaaniko konta 1.5mangni gita kan·dikatna ine miksonganio a·bachengatenga. Gipin rama-jal·ang tariani project-rangara Thenzawl-Sialsuk aro Khankawn-Rongura ramarang ong·ja, jerangan rnambata ramarangko ra·baanichi game cha·giparangna antidamrangona altuae sokna cholko onve namgnirangko ra·bagen. Iuna agreba, Prime Minister Chhimtui chibimani kosako dolongko rikanikoba parakataha, jechin bilsini je karioba manderang re·rurana cholko man·gen aro Kaladan Multimodal Transit Transport Frameworkni ning·o songre-songgabate bading-chiwalanirangko dakna man·gen.
Iarang baksana, Modi Mualkhang-o 30 TMTPA LPG bottling plant-ko rikanina pangchakani ro·ongko songaha, aro Mamit aro Tlangnuam-o chadamberangna nambata poraiani cholrangko on·na inenba gital residential aro Eklavya model school-rangkoba oprake on·angaha.
Kal·susaani bidingo, ua Tuikal-o Khelo India Multipurpose Indoor Hall-o rikgen aro ian national aro international gadango kal·susagiparangko tarina Mizoram-ni manderangna cholko on·gen ine parakataha.
Mizoram a·dokan Act East Policy-o mongsonggipa bak ra·gipa aro North East Economic Corridor-oba nadobaenggipa ong·ani gimin gital project-rang jekai Kaladan Multimodal Transport Project aro Sairang-Hmawngbuchhuah rel rama a·dokko Bay of Bengal baksa nangdimatgen aro South East Asia baksa bading-chiwalanirangko namdapatgen ine Prime Minister aganangaha.
Una agreba, Prime Minister GST-ni bidingo sorkari-ni gital niamrangko janape, nangchongmotgipa bosturang aro sanna-bananiko komibatataha, aro hotel-rango tax-rang komibatanichi Salgro Salaram-o tourism-ko nambatatna cholko on·gen ine aganangaha.
India-ni namroro-silroroanio Mizoram namen nangchongmotgipa kamko ka·enga inenba, jatna-a·songna dakgrikgipa matgrikrang jekai Lalnu Ropuiliani aro Pasaltha Khuangchera-ni on·gilanirangko gisik ra·ataha. Changsao vote-bank politics-ni a·sel galchipako man·genchimoba, India-ni Salgro Salaram-an da·ode India-ko mikkangchi re·dilgipa ong·enga ine ua janapaha.
Na·simang iakoba nina man·gen:
Na·simang iakoba poraina man·gen: Dr D. D. Lapang: Ri Bhoi a·jani manderangni ka·sagipa pagipa aro dilgipa
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
Download our app from playstore – Northeast Media Hub
