Guwahati, Jan 15: January 17 tarik, Sonibar sal-o Prime Minister Narendra Modi-ni jakchi a·songni skanggipa Vande Bharat Sleeper rel gariko West Bengal-ni Mala minggipa biaponi watatgen.
Ia rel gariko Kolkata-ni sepango donggipa Howrah, aro Guwahati-ni Kamakhya junction-ni gisepo watgrikenba, West Bengal aro Assam a·dokrangni gisepo ta·rakbegipa walgimik songregipa rel garini re·aniko a·bachengatgen.
Vande Bharat sleeper rel gariara air conditioner gnanggipa ong·a jeon songregiparang 1AC, 2AC aro 3AC-ko basena man·a. Ia gitalgipa rel gari, da·o dongenggipa salo watenggipa Vande Bharat asongchakani baksa tarigiparangoni dingtang maina iako chel·bea biaprangko ta·rake aro walgimik songrena gita tariaha.
“Ian Indian Railway-na, aro mongsongbate Assam aro West Bengal-na gisik ra·na krabeani ong·a maina ian skanggipa changna Guwahati aro Kolkata-ni gisepo Vande Bharat-ko watani ong·enga, aro ia rel gariko gitalgipa chasongni gitalbatgipa technology-rangko jakkale tariaha. Ia rel gari aro uno kam ka·giparang pilak songregiparangna dongtoaniko on·na krenge kamrangko ka·gen, aro uko dingtangmancha walgimik songrena name tariahani gimin, Guwahati aro Kolkata-ni gisepo songregiparang walo gakatenba, pringgipino an·tangtangni re·angenggipa biapona sokena man·gen,” ine NF Railway CPRO parakataha.
Howrah-Kamakhya ramana agreba, ia sleeper Vande Bharat-ko a·songni dingtang dingtang biaprangoba a·bachengatgen. Ia rel gari konta 14-mangni gisepo km 1000-mang songregen, rel gari attamoni re·chakatenba, pringgipino sokegen, aro uandake, gipin rel garirangna bate konta 2-3rangna songreani somoiko komiatna man·gen.
Ia a·bachengatgenggipa Vande Bharat Sleeper-o ge 16 coach-rang donga: ge 11 AC three-tier, ge·bri AC two-tier aro ge·sa first-class coach, aro iano chu·gimik sak 823-mang manderangko changsano gatna man·gen.
India-ni rel garirango jakkalkugijagipa cholrangko ia gitalgipa rel garirango jakkalaha. Ia rel gariko kontasao km 180 re·na man·e tariaha indiba batbegipa kontasao 120-130 km ta·rake salgen ine tik ka·aha, aro songregiparangna dongtoaniko on·na gita namgipa asongchakanirangkoba tariaha.
“Ia rel garini do·garang station-rangona sokosa an·tangtang kuligen. Songregiparangna Assam aro West Bengal-ni cha·anirangko on·gen. Kamakhya-oni Howrah-ona re·anggipa rel gario Assamese-rangni cha·anirangko on·gen aro Howrah-oni Kamakhya-ona re·anggipa rel gario Bengalirangni cha·anirangko on·gen,” ine CPRO aganangaha.
Songregiparangna naljokaniko on·nagita Kavach automatic train protection system-ko aro jakkala baksana security camera-rangkoba tekaha. Rongtal-an·talatanina jakkalgipa samrang 99 per cent jo·ongrangko nisie galgen, aro balisrang, tuchakanirang aro ba·rarangkoba pilakkon gitalko jakkalgen.
3AC-o gadoani ₹2,300-mang, 2AC-ni ₹3,000 aro 1AC-ni ₹3,600-mang ong·gen, aro ticket-ni damon cha·ani-ringani damrangko ra·chapgen.
