New Delhi, June 24: India a•songni president-na susaenggipa NDA-ni candidate Droupadi Murmu, Sukrobar salo an•tangni nomination-ko file ka•angaha aro uni nomination file ka•ani somoio a•songni Prime Minister Narendra Modi, BJP aro NDA-o bakrimenggipa dingtang dingtang dolni dilgiparangba dongpaaha.
President-ni election-ko re•baenggipa July jani 18 tariko ong•atna siengachim.
NDA-ni candidate-na Murmu-ko a•songni Prime Minister Narendra Modi mingchengaha aro iako a•songni Defence Minister Rajnath Singh-ba namnikpaaha.
Murmu-ni bimingko minggipa gipin dilgiparangara, BJP-chi sason ka•a man•enggipa a•dokrangni chief minister-rang, NDA-o bakrimenggipa dingtang dingtang dolni dilgiparang ong•a aro Murmu-ko NDA-ni candidate-na biming minganio Meghalaya a•dokni Chief Minister Conrad K Sangma-ba saksa ong•paahachim.
A•songni president-na susaenggipa Draupadi Murmu-ara Odisha a•dokni saksa dilgipa ong•e nomination-ko file ka•na gita skanggipa Tribal me•chik dilgipaba ong•ahachim.
President-ni kamna seokako man•genchimode uan skanggipa Tribal me•chik dilgipa ong•gen aro ia kamna me•chikrangoni gnigipa ong•genchim.
India a•songni da•o President ong•enggipa Ram Nath Kovind-na dongimin kam ka•ani somoi July 24 tariko bon•engaha aro uandaken uni biapko ra•rikna gita presidential election-ko July 18 tariko ong•atenba, result-ko July 21 tariko parakna siengachim.
