Shillong, Aug 31: National Livestock Mission-ni ning•o game ge•e cha•giparangna ra•gatgipa Rural Backyard Piggery Scheme, jekon ‘Progress’ scheme ine mingskaahachim, ia scheme-ko Budbar salo, Meghalaya a•dokni Chief Minister Conrad K Sangma, Ri Bhoi a•jani Byrnihat-o oprake on•angaha.
Ia scheme-ko a•bachengate on•angani somoio a•dokni Chief Minister, jinmana aganprakangengon, game ge•e cha•enggipa manderang, wakrangko jilanichi, pangkamgipa janggi tangani cholrangko man•china gita ia ‘Progress’ scheme-ko sorkari ra•gate on•aha ine parakangaha.
Dingtang dingtang scheme-rangko ra•gate on•anichi a•dok sorkari, game ge•e cha•enggipa manderangna janggi tangani cholrangko on•na man•enga ineba ua aganaha.
Meghalaya a•dok, metric ton 18,000-mangni gita wak be•enrangko dingtang dingtang a•dokrangonikosa ra•baenga aro a•doko wak be•enrang chu•ongkujaenga ine janapatengon, ia piggery scheme-chi a•dok sorkari wak be•en chu•onggijaniko namatna ka•dongsoenga ine Chief Minister parakataha.
Songo noko donggipa manderangna wak, do•o, do•bok aro uandakgipa jilla kaanirangko dake cha•na on•na gita sorkari, ia ‘Progress’ program-ko a•bachengataha ineba ua aganaha.
Rural Backyard Piggery Scheme-ni skanggipa bako sorkari, gong kror 15.18 tangkarangko chame donaha aro iani ning•o bi•sa pe•ninggipa rokomni wakrangko 6000 nokdangrangna sualatgen ineba Chief Minister parakataha.
Ia program-ni gnigipa bakna gong kror 25 tangkarangko chamdapgen ineba ua aganaha.
