Shillong, Jun 10: Indore songjinmaoni re·bagipa tourist Raja Raghuvanshi-ko Sohra jolo so·otani aro uni ja·man uni jikgipa Sonam baksana gipin sakbri manderangko rim·ani case-ko ta·raken bichal ka·na gita Meghalaya a·dokni Chief Minister Conrad K Sangma ku·rachakangaha.
“Ia case-ko chinga man·a dipet ta·raken matchotatna nangnikenga aro Meghalaya sorkarichipakni je ja·ku de·na nanganirang donggenchim, chinga pilak kamrangkon ta·raken ka·gen,” ine Sangma aganaha.
Antisa batpile gimagipa Sonam Raghuvanshi-ko sandiani ja·man ua an·tangan Robibar walo, Uttar Pradesh a·dokni Ghazipur a·jao donggipa Nandganj police station-o bame on·eaha aro unbaksana Raja Raghuvanshi-ko so·otanio jak donganina gipin sakbri manderangkoba police-rang, Uttar Pradesh aro Madhya Pradesh a·dokrangoniko rim·aha.
Sonam-ni Nandganj police station-o bame on·eani ja·man joljol police-rang uko rim·aha aro da·o uko Meghalaya-ni police-rang, kachario bichal ka·na gita Meghalaya a·dokona rimbapilengaha.
Mitam national media-rango ia a·sel ong·anina Meghalaya a·dokko ong·gija dake matnangahani gimin an·tangni suk ong·gijaniko parakatskaengon, badiaba badiaba national media-rang, ia a·selna Meghalaya a·dokko aro a·dokni manderangko matnangna jotton ka·aha indiba da·o pilakan kakketko ma·sina man·aha ine Chief Minister aganaha.
Meghalaya aro salgro salaram jolni manderang pangnan gipin biaprangoni re·bagipa manderangko kusi ong·e nokchakgiparangsa ong·a ine janapatengon, ia a·sel ong·anina Meghalaya a·dokko mitam media-rangni matnangna jotton ka·aniara namen kragijani ong·a ine Sangma aganaha.
Ia a·selko antisani gisepon ma·sina man·ahani gimin aro dos dakgipa manderangko rim·na man·ahani gimin Meghalaya Police-ko mittelpilangengon, ia a·selni bidingo police-rang skangan ma·sina man·ahachim indiba am·sandianirango nangchakeaniko man·jana gita police-rang, iako darangnaba ma·siatgija kamko ka·aha ine Chief Minister parakataha.
Na·simang ia video-koba nina man·gen:
Na·simang iakoba poraina man·gen: Manipurni Additional Police Officerko Arambai Tenggol dolrang chadrapa
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Instagram- www.instagram.com/ne_media_hub
