Wlliamnagar, Nov 09: Ma·mong sorkarini Ministry of Culture aro Raja Rammohan Roy Library Foundation-ni dakchakanichi, East Garo Hills a·jani District Library aro Arts and Culture Department, Raja Rammohan Roy-ni chang 250-gipa atchiani salko gisik ra·e Butbar salo Williamnagar-ni DRDA Hall-o maniangaha.
Ia manianio, East Garo Hills a·jani Additional Deputy Commissioner, Pa Aloysius Ch. Marak mongsonggipa sokgipa ong·aha aro Educere Higher Sec. School-ni Headmistress Ma Gamchi Timre R. Marak mande ra·ako man·na kragipa sokgipa ong·e bakko ra·angskaaha. Uandake, Williamnagar jolo donggipa Sacred Heart School, Greenyard Higher Secondary School, Rongrenggre Govt. Higher Secondary School, Educere Higher Secondary School aro Trinity School-ni sak 250 mangna batpile chatro-chatrirangba bakko ra·angtokaha.
Programo, tom·aniko dakdilanggipa District Librarian Suziana R Marak, sokbagiparangko rimchaksoenba, Raja Rammohan Roy-ni gimin skul bi·sarangna adita talataniko on·angaha.
Mande ra·ako man·na kragipa sokgipa, aro National Award-ko adita salrangna skang ra·chakanggipa Ma Gamchi Timre R Marak, me·chikrangko bilgnangatani ba Women Empowerment-ni gimin aganangengon, songsalo pilak namgijagipa dakbewalrangko bon·atna gita Raja Rammohan Roy-ni kamrangko ka·ani gimin agan-talate ong·anga baksana, tom·ao bak ra·gipa sakanti chatro-chatrirangko mikkangchi krenge aro rakbate poraiangchina gita didianirangkoba on·angaha.
Apsandake, W’nagar-ni ADC Pa Aloysius Ch Marak-ba me·chikrangko bilgnangatni gimin aro Raja Rammohan Roy-ni mongsonggipa kamrangni gimin chadamberangna aganprakangaha.
Tom·a matchotani ja·man, skulni chatro-chatrirang, lekka pal·takrango dingtang dingtang sea-tokanirangko dake uamangni skigiparang baksa re·jomaniko ong·atenba, ja·mano uamnagna cha·ani-ringanirangkoba suale on·angaha.
