Tura, Oct 27: Bilsisamangna skang Rajabala-oniko rim·srukangako man·gipa bilsi sokkugijagipa me·chik bi·sako West Garo Hills-ni police, Delhi police-ni dakchakanichi jokatna man·aha. Ia me·chik bi·sako Delhi-oniko man·aha aro uko Robibar salo West Garo Hills-ni skotong Tura-ona rimbaaha.

Re·anggipa October 20, 2024-o me·chik bi·sani nokni manderang FIR-ko segataha.

Re·anggipa bilsioni police-rang dos dakgipako aro rim·sruka man·gipa me·chik bi·sako sandina jotton ka·engachim indiba adita salrangna skangsan uamangni Delhi-o dongani koborko man·aha ine West Garo Hills-ni Superintendent of Police (SP) Abraham T Sangma parakataha.

“Chinga Delhi police-ni dakchakaniko am·aha aro uamang ua me·chik bi·sako sandina dakchakaha. Chinga Sukrobar salo chingni police-rangko watataha aro uamangko Sonibar salo rim·na man·aha aro Robibar salo Tura-ona rimbapilna man·aha,” ine Sangma aganangaha.

A·bachengode matnangako man·gipa mandeni kosako me·chik bi·sako rim·srukanganina badi ka·aha indiba uko jokatani ja·mano Protection of Children from Sexual Offences (POCSO) Act-ni adita bakrangko on·chapgen, uandake da·o matnanga man·gipa mandeko sal-14na pattoko donatchengaha ine Sangma aganangaha.

Koborrangko man·soani gitade, Robibar pringo, rim·srukangako man·gipa me·chik Tura Civil Hospital-o me·chik bi·sako an·pakaha.

Indake ua me·chik bi·sako West Garo Hills-ni Rajabala-o songdonggipa Atowar Hussain ba Rahul minggipa mande saksa Delhi-ona rimangaha. Ua somoio ua me·chik bi·sa bilsi 18 gapkujachim.

Bilsisani ja·mano, ua me·chik bi·sa an·tangni ma·a-paana kobor on·atna man·aha aro uko Delhi-o donenga indiba badia biapo uko ma·sija ine an·tangko dakchakchina mol·molaha.

Jajrengani gape aro demechiktangko man·pilna ka·oksie, uni ma·a-paa ACHIK dolni dakchakaniko bi·aha aro uandake uamang Tura Women Police-na u·iataha.

October 21 tariko, ACHIK-ni adita sak manderang me·chik bi·sani ma·drang-maharirang baksa Delhi-ona re·ange uko sandiaha. Adita salrangna sandiani ja·mano uko South Delhi-ni Batla House minggipa gittimo donenga ine u·ina man·aha aro uamang iako Tura Women Police-na kobor on·ataha.

Uni ja·mano October 24 tariko, Tura Women Police-ni adita sak police-rang Delhi Police baksa bakrime, Special Police Unit for the Northeastern Region-ni (SPUNER) dakchakanichi Batla House-o sandianirangko dakaha aro uandake matnangako man·gipa Atowar Hussain-ko rim·aha.

October 26 tariko matnangako man·gipa aro rim·srukangako man·gipa sakgnikon Tura-ona rimbapilaha aro uni ja·mano me·chik bi·sako Tura Civil Hospital-o donaha, aro uandake salgipin pringo ua bi·sako an·pakaha.

“Delhi-ona rimangani somoio ia me·chik bi·sa bilsi 18 gapkujani gimin ia obostade POCSO Act-ni ning·o ong·gen. Matnangako man·gipa mandeko kidnapping aro human trafficking-ni ning·aoba mokordoma ka·anggen. Ia me·chik bi·sa indita bilsi dambeengon bi·sa an·pakna nangaha. Bi·sani pagipako namedake ma·siahaon, matnangako man·gipako ru·uta bilsirangna pattoko donanggen,” ine saksa senior lawyer aro Garo Hills-ni POCSO prosecutor Hub News-na parakataha.

Na·simang iakoba nina man·gen: 

Na·simang iakoba poraina man·gen: B’ladesh-oni napsrukbagipa sak 5 manderangko City Police rim·a

na·simang hubnetwork.in, oniko video-ko niangan baksa poraina man·gen.

Chingko ka·mao mesokgipa social mediarango jarikna man·gen:-

Twitter- twitter.com/nemediahub

Youtube channel- www.youtube.com/@NortheastMediaHub2020

Instagram- www.instagram.com/ne_media_hub