Tura, June 30: “Heart Attack aro Cardiac Arrest: Maia dingtanggrika?” ine katta bichongko done, Trained Nurses Association of India-ni West Garo Hills unit, uni Continuing Nursing Education (CNE) programmeni gita, Sobar salo, SMELC, Tura-o salsana workshop-ko ong·ataha. West Garo Hills a·jani dingtang dingtang sorkarini aro private hospitalrangni nurserang iano bak ra·angaha.
Ia workshop-o rang·gitik ka·tongni sabisirangko man·giparangko sanna-bananiko dakanio u·iani aro changa-sapani, heart attackrang aro cardiac arrestrangni dingtanggrikani, aro dingtang dingtang sanna-banani bewalrang jekai CPR, Basic Life Support (BLS), aro Advanced Cardiovascular Life Support-ko (ACLS) skie on·aha.
Cardiopulmonary Resuscitation-ara (CPR) cardiac arrest ong·ani somoio ka·tongo su·depdepe aro rang·sitdape balwako re·atani bewal ong·a. Basic Life Support-ara (BLS) CPR-ni ja·mano automated external defibrillatorrangko (AED) jakkale cardiac arrest-ko u·isoani dakbewal ong·a. Advanced Cardiovascilar Life Support-ara (ACLS) ECG, balwa ramarangko jokatani aro IV-rangko jakkale hospitalrango sanna-bananiko dakani bewal ong·a. Ia minggittam sannani gadang gittam bewalrangara ka·tongni sabisirangko man·anio mandeko jokatna dakchakgipa ong·a.
Tom·aniko a·bachengo Chisime Wegara heart attack aro cardiac arrestni mongsonggipa dingtanggrikanirangko talate on·chengaha. Uni ja·mano, Dr. T Sarangpi Sangtam, mandeko rang·sitna aro mikselna nangchongmotgipa aro siaoni jokatna dakchakani bewalrangko talate on·angaha.
Uni ja·mano, Dr. Stevie Jaseng N Sangma, heart attackrangni ong·ani a·selrang, sabisiko rim·a man·ani bewalrang aro sanna-bananirang baksa ECGko poraiani bewalrangko ning·tue agane on·angaha. Cha·a-ringani neng·take skianirangko daktaio, Dr. Sangtam BLS aro ACLS-ko skie mesokaha, uandake bak ra·giparangna rang·gitik somoirango dakna nanggnirangko mesoke on·angaha.
Ia workshopko ong·atanichi bak ra·giparangni kam ka·anio changa-sapaniko namdapatasan ong·aija indiba CNE programmeni ning·o license-ko taripilanioba dakchaka ine West Garo Hills a·jani District Family Welfare Bureau-o Public Health Nurse-ni kamko ka·enggipa Salchira D. Sangma aganaha. Una agreba nurserangna India-ni a·palchi kamrangko ka·na Skotong Minister chol on·anirang, nurserangko a·gilsakni dingtang dintang biaprango kamrangko skibae Garo Hills-ona re·bapile nambate dangdike on·na dakchakgen ineba ua aganaha.
Bang·a bak ra·giparangan ia workshopko da·ororo nangchongmotgipa aro namen dakchakbegipa ong·a ine mitelaha. Workshop-o CPR-ni gimin skie ra·anggiparangko an·tangni kam ka·rimskarang aro songni manderangna agan-skie on·skagen ine Dalu CHC-ni Staff Nurse Urmila Hajong-ba aganaha. Una agreba, ia skie ra·anio bak ra·anichi ka·tongni sabisirangko man·ani somoio sanna-bana aro dangdike on·a ka·donganiko batataha ine Tura Christian Hospital-ni School of Nursing-ni Nursing Tutor Detchi T. Sangma aganaha.
Workshop-ni matchoto, pilak bak ra·giparangna certificate-rangko sualataha.
Na·simang ia video-koba nina man·gen:
Na·simang iakoba poraina man·gen: EKH-o a·palchini songrebagiparangko a·bri doanina tour guide-ko rimbitna nangchongmotani niamko ra·gata
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Instagram- www.instagram.com/ne_media_hub
