Shillong, Nov 18: Re·baenggipa 2023 bilsio a·doko Assembly election-rang ong·na am·enggipao BJP dolni tikito susana am·enggipa candidate-rangko December jani skanggipa antion ma·sina gita man·gnok ine Meghalaya BJP-ni state president Pa Ernest Mawrie, Sukrobar salo u·iatangaha.
Ma·mong BJP-ni dilgiparang, gimik ge 60 seat-rangon susachina gita ge·etataha ine u·iatan baksana, eleksin ong·na mikkang-mikkang da·o sakgittam MLA ong·enggiparang December jao BJP-o napetokna am·enga aro gipin MLA-rangba napna gisiko sikanirang dongenga ineba u·iataha.
Candidate-ko seokanio party-ni ja·rikna nanggipa niamrang aro tik ka·giminrang gnang ine aganangkuengon, ua an·tangan BJP-ni state president ong·omangba, 18-West Shillong Constituency-oni candidate ong·e an·tangko parakatna man·ja, maina sawamancha susagen ukode Central Parliaentary Board-sa bon·kame chanchienba tikitko on·ani gimin tik ka·anggen ine Pa Mawrie parakataha.
Adita salrangna skang, dingtang dingtang mamlarangko gatjetaoni jamin man·e jokbagipa Tura-ni MDC Pa Bernard Marak-ni gimin aganangskaengon, Pa Marak, Tura Constituency-oni susana am·enggipa candidate ong·a, beben, uni mamlarang kacharini jako ong·kuengoba, jamino jokbaanichi uni kosako segatgimin mamlarango maming sakkirang donggijaniko nikna man·a, ine dolni padot agandapataha.
Re·baenggipa changode BJP dolni sorkariko rikgnina uamang ka·dongsoenga maina, a·dokni manderangba sorkari dingtanganiko nangniktokenga aro BJP dolna agrede gipinrangde chol dongjawa ineba Pa Mawrie parakataha.
