Nongpoh, March 21: Sombar walo, manderangko salangenggipa bus gari bolsa, Ri Bhoi a•jani Shangbangla samba jolo donggipa NH-6 ramao bikpileke a•sel ong•aha aro ia gari a•sel ong•anio adita sak manderang saknaanirangko man•aha.

Koborko on•ani gitade, Sombar walo, AR-20 9099 Night Super bus gari bolsa, Guwahati-oni Silchar-ona manderangko salangengachim indiba ia gariko salgipa, nangana bate ta•rakdugae salahani a•sel Shangbangla samba jolo gonggegipa ramao garini ta•rakaniko amchakjae, ia gari bikpile a•sel ong•aha.

A•sel ong•ani ja•man saknaa man•gipa manderangko bakan sannaniko on•na gita Nongpoh Civil Hospital-ona ra•angaha. Bilongbate saknaa man•gipa manderangkode ja•mano nambate sanna gita Shillong Civil Hospital-ona ra•angskaaha.