Shillong, March 21: Non-Government Lower Primary School-rango skigipani kamko ka·enggipa skigiparangko kamo rakkikamani bidingo a·dok sorkari chanchirimgen ine a·dokni skotong minister Pa Conrad K Sangma, Mongolbar salo assembly tom·anio ka·dongataniko on·angaha.
2007 bilsina skang administration ba school-ni Deputy Inspector-rangchi seokako man·gipa sak 461 mangna batgipa non-government LP school-rango skigipani kamko ka·enggiparangna pangkamgipa kamko on·e, batanggimin chango a·dokni bil-sasonko jako ra·anggipa Meghalaya Democratic Alliance (MDA) sorkari, bilsi 30-rangna galchipgipa kamko chu·sokataha ine Pa Sangma assembly-o aganangenba, iani bibingo mikkangchi ja·kuko de·na man·na gita chinga chanchirime kamko ka·anggen ine ua tom·ao parakataha.
Skigiparangko kamo rakkikamani bidingo sing·anina, a·dokni gital Education Minister Pa Rakkam A Sangma-ni iana skang aganchakanganio, sorkarini chalaigipa lower primary school-rango ka·gipa sak 1985 skigiparangnaba sorkari pangkamgipa kamko on·aha ine u·iatangaha.
Unomiting, watchanga man·gipa non-government lower primary school-rango ka·enggipa skigiparangna pangkamgkipa kamko on·ani bidingo Nongpoh-ni UDP MLA Maryalborn Syiem-ni ma·sina nangnike sing·anina, Pa Rakkam, iani giminde uno u·iani dongja ine aganangenba, jekon MLA naatahachim ia mamlako ua chanchirimaona ra·anggen ine aganchakangskaaha.
Iana, Pa Syiem, skigiparangni chagrongenggipa neng·nikani bidingo niroke kamko ka·atchina gita minister-ko mol·molangaha.
Gital education minister, indake ong·engon, adhoc skulrango pilak skienggiparangna pangkamgipa kamko on·ani dongjawa ine Nongkrem-ni VPP-ni MLA Pa Ardent M Basaiawmoit-ni assembly-o sing·anggipanaba aganchakaniko on·angjolaha.
