Shillong, Sept 26: Ri Bhoi a•jao MeECL-ni Umsning Division-ko chalaina gita private company-rangna on•aniko jegale Sombar salo, KSU, HNYF, FKJGP aro jolni dilgiparang, a•dokni Deputy Chief Minister aro Power Minister Prestone Tynsong-ko grongeaha.
Power Minister-o grongani ja•man kobor ra•timgipa manderang baksa agangrikengon, department-rangko private company-rangchi chalaianio uamang bang•en kam olgrokanirangko nikna man•ahani gimin Umsning Division-o donggipa MeECL-ko private company-rangna on•aniko uamang raken jegalenga ine dingtang dingtang NGO-rangni nangrime bikotgipa Joint Action Committee (JAC)-ni secretary Ferdynald Kharkamni parakataha.
Mawsynram, Mawkyrwat aro Garo Hills-o MeECL-ko chalaina gita FEDCO-na on•ani a•sel maikai manderang aro MeECL-o kam ka•enggiparang neng•nikanirangko chagrongna nangtokengachim, uarangkoba uamang nikmanaha ineba JAC-ni dilgipa parakataha.
Umsning Division-ko chalaina gita private company-na on•aniara a•dok sorkarini, manderangni kosako re•ani gitasa ong•gen ineba Kharkamni parakataha.
MeECL-ko chalaina gita private company-rangna on•na skang awareness program-ko ong•atchengchina sorkariko didiatengon, Ri Bhoi a•jao songdongenggipa manderang iako ra•chakgenchimosa sub-division-rangko private company-rangchi chalaina on•gen ine JAC parakataha.
Indake ong•engon, Umsning sub-division-ko chalaina gita private company-na on•na u•iataniko dontongatchenge, ia jolrango bijoli jakkalenggipa manderangna awareness program-ko ong•atna Power Minister ku•rachakaniko on•ataha ineba JAC-ni secretary parakataha.
