Shillong, July 25: Re•anggipa Sukrobar salo, Tura-ni BJP MDC Bernard N Marak-ni Edenbari jolo donggipa baganko police-rangni chadrapanio sorkari maming dakeba jak dongja ine Sombar salo, National People’s Party (NPP)-ni national vice president aro Meghalaya a•dokni Deputy Chief Minister Prestone Tynsong talataniko on•angaha.
Tynsong-ni parakatani gitade, ia a•selni bidingo baganni nokgipa aro BJP-ni MDC Bernard Marak, politics kal•na jotton ka•engoba sorkaride niam gita ja•kuko de•na on•na nangaiachim.
“Chinga sorkarini gitade ia obostao maming dakeba jak dongja. Indiba ua Chief Minister-ni kosako susaenggipa ong•ani gimin chinga kene dongengaba ong•ja. Ia a•selko uni politics kal•na jotton ka•aniara maming orto dongjaenga,” ine Tynsong parakataha.
Tura MDC-ni baganko police-rangni chadrapanio bang•en chu bottle-rangko aro gipin bosturangko nikna man•aha indide iara mai nama ong•aha ineba Tynsong sing•doangaha.
MDC-ni baganko chadrapaniara uko ra•ongalna gita sorkarini tarisamsoe chadrapanisa ong•genchimode ua maina FIR-ko ka•jaha ineba NPP-ni national vice president sing•doangaha.
Police-rangni kamo pangnan sorkari jakgitele kamko ka•na on•a aro niam gita ka•na on•a ineba Tynsong parakataha.
Tynsong-ni parakatani gitade, police-rang nanga gita sakkirangko chimongchenge man•ani ja•mansa Tura MDC-ni baganko chadrapeaha.
