Baghmara,March 4: Rongara-Siju MLA, Pa Rakkam A.Sangma, ru.uta sal somoirangoni senge dongenggipa, Halwa Atong songoni Chitmang Gongrot songona dakanggipa sorokko tarina da.al Bristibar salo pangchakani ro.ongko songe on.anangaha.
Ia sorokni bakroa gimik km 4.15 miter-rang ong.achim. Ia pangchakani ro.ongko songe on.ani salo Baghmara-ni Gitcham MLA aro Meghalaya State Health Advisory Board-ni Co-Chairman Pa Satto R.Marak, SGH-ni Deputy Commissioner Pa W.Nongsiej, Rongara C&RD Block-ni BDO Pa Pilot R.Marak, Baghmara PWD-ni EE Pa Kurbah, PWD-ni official-rang, Siju-ni NPP-Candidate Pa Arbinush R.Marak aro bang.a songni manderangni dongpaanio pangchakani ro.ongko songe on.angaha aro ian songdongenggipa sakantina gisik ra.beani sal ong.a.
Koborna parakatani gitade, Chitmang Gongrot songo nokdang ge-120 mang dongachim, ia songo tangka paisa man.ani ja.pangara bagan barirangko ge.e game man.gipa bolam biterang jekai gue, rubber aro sashwnut-rangan mongsonggipa ong.achim, uarangko pale sim.e bilsianti gong 1.5 krol tangkarangko songadam, iarangchin songadamrango janggi tangenggipa manderang tangka paisa man.anirangko tang.doatna gita man.enga ine u.iataha.
