Shillong, May 31: A·doko roster system-ko ra·gatani aro job reservation-ko nipiltaichina dabienggipani bidingo dingtang dingtang dolrangni gisepo Butbar salo tom·e chanchirimangani namen bite gnanggipa ong·aha ine committee-ko dilenggipa Dr Ampareen Lyngdoh, parakataha.
Tom·e chanchirimanio, a·dokni pilak political dolrangan an·tangtangni nangnikanirangko aganangtokaha ine janapatengon, mitamrang skango jekon ja·rikbaenga ua apsankon rakkiangkuchina aganaha aro mitamranga ia mamlani gimin nambate ja·kurangko de·na man·na gita expert committee-ko songchina agan-ku·pattiangaha ine Ma Lyngdoh parakataha.
Jerangkon chinga da·alni gisepo chanchirimaha, iani gimin nambate tik ka·aniko dakchina gita chinga chingni chanchigiminko a·dok sorkarina watatgen aro ia mamlani bidingo chinga re·baenggipa anti-gittamrangni gisepon tom·e chanchipiltaigen ine Ma Lyngdoh paraktaha.
Reservation policy-ni gimin chanchirimani kattade namen dal·bea aro changsa-changgni asongrime golpoachide matchotatna aro tik ka·na gita man·chipjawa ine janapatenba, ia mamlako gimikni namgnina nambate ja·kuko de·na man·na gita jinmakoba uamang baksa bakrime sengchina gitaba Ma Lyngdoh mol·molataha.
