Shillong, May 29: Meghalaya-o sorkarini kamrangna mande rim·anio niamko nambate ja·rikna man·na gita ra·gatnasienggipa Roster system aro skangoni ja·rikbaenggipa a·dokni Reservation Policy-ko ra·e a·doko songdongkamgipa jatgittamni gisepo adita meligrikgijanirang dongengani gimin darangni agan-ku·pattianiko aro agananirangko knae ra·na gita jatni namgnina kamko ka·enggipa dingtang dingtang dolrang baksa a·dok sorkarini Shillong-o tom·e chanchirimanio A·chik Conscious Holistic Integrated Krima (ACHIK) dol bakko ra·ejana gita Sombar salo parakataha.
Iani bidingo ACHIK dolni padot Macklawrence M Sangma-ni Meghalaya sorkarini chittina aganchakaniko on·atgipao, uamangni dingtang dingtang nangnikanirangko chu·sokate on·chengchina gita a·dok sorkario mol·molatengon, skanggipao ia nangchongmotgipa mamlani gimin A·chik dolrang baksa chanchirimaniko A·chik a·songni skotong Tura songjinmao ong·atna nangnikaniko uamang janapataha.
Gnigipao, dingtang dingtang dolrang baksa Roster system-ni gimin chanchirima baksana Tura songjinmako Winter Capital ba a·dokni gnigipa skotong dake songani giminba chanchirimjolna nangnikaniko uamang janapatan baksa, gittamgipao, batanggimin somoio a·dokni skotong minister Pa Conrad K Sangma-ni koborna u·iatanga gita ia mamlarangni bidingo district damantion dingtang dingtang dolrang baksa chanchirimchenganiko nangnikenganikoba ACHIK dol chittio janapatjolaha.
Indake ong·engon, ia mamlarangni gimin dingtang dingtang dolrang baksa tom·e chanchirimaniko A·chik jat gimikni namgnina Tura songjinmao ong·atchina gita ACHIK dol, sorkariko mol·molataha.
