New Delhi, May 24: COVID-19-ko warachakna Russia a·songo tarigipa Sputnik V aro Panacea Biotec tikarangko ding·kari a·bachengahaon India a·songoba man·gnok ine ia tikarangko tarigipa manderang u·iataha.

Bilsio pong million 850-na baten tikarangko tarin agita Russian Direct Investment Fund (RDIF), India a·songo sam tarigipa dolrang, jekai Gland Pharma, Hetero Biopharma, Panacea Biotec, Stelis Biopharma aro Virchow Biotech baksa nangrimaha aro Sputnik V-ko India a·songo jakkalna gita India a·songni drug controller-ba ra·chakmanaha.

Sputnik V-ko rang·gitik jakkalna dongimin niamrango pangchake April-ni 12 tariko India a·songo register ka·aha aro ua Russia-ni tikako May 14 tarikoni jakkalna a·bachengahachim.

“RDIF baksa nangrime Sputnik V-ko tarina a·bachengatanichi chinga India a·songo aro a·gilsak gimikon sabisi giproroaniko namatpilna ka·dongenga,” ine Panacea Biotec-ni managing director Rajesh Jain parakataha.

Russian a·songoniba Sputnik V tikarangko May jao pong million gittam, June jao million bonga aro July jao million 10 tikarangko man·chape gimik million 18 tikarangko India a·songona sokatna miksonganiko parakataha.