Tura, Sept 25: Congress dolni saksa niksenggipa aro GHADC-ni gitcham dilgipa Pa Welly D Shira, re·anggipa anti Sonibar salo una chakpagipa sak 2000 baksana NPP dolni National President Pa Conrad K Sangma aro gipin dilgiparangni dongpaanio National People’s Party (NPP) dolo napangaha.
South Garo Hills-ni Chokpot, Warimao-o Pa Welly D Shira-ko NPP dolona dal·bee rimchaksoaniko dakangani somoio, Govt. Chip Whip aro MLA Pa Marquise N Marak, NPP-ni padot Pa Samford B Sangma, GHADC-ni CEC, Pa Albinush R Marak, GHADC-ni chairman Pa Sengchim N Sangma, GHADC-ni MDC aro EM, Pa Sengbath R Marak aro dolni gipin dilgiparangba dongpatokaha.
Re·baenggipa 2023 bilsio, a·doko mongsonggipa eleksin ong·na skang, a·dokni dingtang dingtang political dolni dilgiparangni NPP dolna chakpatokenganichi National People’s Party-ni bilakdapataniko nikna gita man·enga.
Unomiting NPP dolo napange, NPP-ni nokdang baksa kamko ka·na una namgipa cholko on·anina Pa Welly, dolko dingtangmancha mittelpilangan baksa, tom·bagiparangni mikkango agananganio, a·dokko namroro-silroroatna gita gisiko nange kamko ka·angkuanina a·dokni skotong minister aro NPP-ni National president Pa Conrad Sangma-koba ua de·mittelangjolaha.
Meghalaya-ni skotong minister Pa Conrad K Sangma, uko dolona dingtangmancha rimchakaniko dakangenba, Pa Welly-ni NPP nokdangna chakpaaniko on·anichi South Garo Hills a·jao dolko bilak-mangrakdapatna gita mikkangchi namgipa chol ong·gen ine parakatan baksa, Pa Welly saksa gitcham dilgipa ong·eming dolo uni bakrimanichi a·jani manderangni ku·rangrangko dolni miksonge kam ka·anio man·gopate ka·mabatgipa gadangoni kamrangko ka·chakatna gita man·gen ineba skotong minister chanchiatangko parakatjolaha.
