Tura, Aug 30: Meghalaya-o A·chikkuchi salanti koborrangko chapa ka·gipa kingsamangmang donggipa Salantini Janera songbad-ni bilsi kolgrikbonga (2000-2025) ong·aniko Sonibar salo Hotel Polo Orchid, Tura-o maniangaha.

Ia tom·bimonganio a·dokni Skotong Minister Conrad K Sangma mongsonggipa sokgipa ong·e re·baaha, unbaksana Parliament-ni Member Saleng Sangma aro Opposition-ni dilgipa Dr. Mukul Sangma dingtangmancha okamako man·e re·baaha. Uamangna agreba, West Garo Hills-ni Deputy Commissioner Vibhor Aggarwal, IAS, aro gipin dilgiparang aro sokgiparang re·bae bak ra·angaha.

Skotong Minister Conrad K Sangma, jinmana parake aganatengon, bilsi kolgrikbonga-na Garo Hills aro Meghalaya-ni manderangna dangdike on·anina Salantini Janera-na an·tangni nama skaniko on·aha

“Politics-o napna skang, angni pagipa sagi P A Sangma Chadambeni Ku·rang ingipa A·chikku songbadko a·bachengataha indiba bang·a neng·nikanirang aro a·selrangchi uko chalaina man·jaha,” ine ua aganaha.

Uandake bang·a neng·nikanirangko man·genchimoba chakcike aro ka·donge bilsi 25-na songbadko chalaianina ua rasong chae aganaha. Da·ororoni chasongo koborrang, manderangni chanchianirang aro tol·e jangbingbanggiparang bringenchimoba, Salantini Janera ru·uta bilsirangna manderangna ka·dongniko on·aha ine ua aganangaha.

“An·chingni ka·sara a·doko songdonggiparang ong·e, pilak manderangan a·doko agangipa ku·sikrangni gimin u·ina nanga, mongsongbate Khasi, Garo, aro Pnar ku·sikrang aro iandake manderangko ku·tangko aganatna inenba, skulrango Khasi aro Garo ku·sikrangko nangchongmotgipa subjectrang ong·atna sorkari kam ka·enga,” ine skotong minister talataha. Una agreba, 8-gipa schedule-o Khasi aro Garo ku·sikrangko on·chapna ine ma·mong sorkari-ni aganchakaniko sengmitingo chu·sokaniko man·na pilakni bakrimaniko  nanga ine skotong minister manderangna didianiko on·aha.

A·gilsak gimiko media-ni chagronggipa neng·nikanirangkoba skotong minister janapaha jekai chapa ka·gimin songbadrangko poraiani komiroroani, digital platform-rangni tang·doani. Indake ong·genchimoba, songbad-ni gunko rakkianina aro poraigiparangni ka·donganiko man·kuanina ua Salantini Janerako mitelaha. Media-ni kam-ara manderangna songsarni neng·nikanirangko agane on·anian ong·a, indiba basakobade sorkari-rang baksa nanggrikaniona soka ineba ua aganangaha.

Uandake ua tom·bimonganio uni, Opposition-ni dilgipani aro Parliament-ni Member-ni damsan bakrimaniara ku·cholsan meli-nangrimaniko mesoka ine ua aganangaha. “Chinga dingtang dingtang party-rangoni ong·genchimoba aro chingni chanchibewalanirang dingtanggenchimoba, chingni miksongani apsan ong·a – Garo Hills aro Meghalaya-ni manderangni silroro-namroroe janggi tangani,” ine ua talatangaha.

Una agreba, politics-ni dilgiparang aro media-ni mande ra·grike, aro bakrime manderangni namgnina kam ka·ani giminba ua aganangkuaha. Tom·aniona re·bagipa pilak dilgiparangko ua mitele aganaha aro mikkangchinaba kakketani, nama gunrangko rakkiani aro manderangna ka·donganiko on·angkuchina ine Salantini Janera-na an·tangni nama skaniko on·angaha.

Saleng Sangma ia tom·bimonganio bak ra·na rasong chabea ine agane, Salantini Janera-ra koborrangko on·timgipasan ong·aija indiba dingtanganiko ra·bagipaba ong·a ine aganangaha. “An·ching ku·siktangko aganon aro knatimon, dingtangman rasong chaaniko man·a,” ine ua aganangaha.

Uandake Salgro-Salaram a·dokrangni ku·sikrang gimaangengaha ine ua janapaha, aro Constitution-o ming 22 ku·sikrangko ra·chakgenchimoba, sea-jota aro itihas dongani ja·manoba A·chikku aro gipin ku·sikrangde ra·chakaniko man·kuja ine ua talatangaha. IAS aro IPS porikkarangko ku·siktangchi sena on·na nanga jedakode a·brio donggipa jatrang ia porikkarangko seani cholrangko galjawa ine ua aganangaha.

Uandake print aro digital platform-angko jakkale ku·sik aro jatni dakbewalrangko ripingani gamchatani gimin ua talatangaha aro a·brini jatrangni ku·sikrangko ripingna bakrimtokna dingtang dingtang party-rangni dilgiparangna ku·mongrimaniko on·angaha.

Dr. Mukul Sangma-ba bang·a neng·nikanirangko chee bilsi 25 ga·tapna man·anina Salantini Janera-na an·tangni nama skaniko on·aha.

Press-ara democracy-na nangchongmotgipa ong·a aro uan sorkari rikaniko nitimgipa ong·a ine ua talataha. Salantini Janera Garo Hills-ni manderangna nangchongmotgipa ong·a, aro ian songdonggipa manderangna uamangni blini gimin mikrakataniko on·gipa ong·a ine ua manderangna gisik ra·ataniko on·angaha.

Garo Hills-o koborrangko parakatanio neng·nikaniko on·giparangni giminba ua janapangaha aro media-ko nambate dakna, bang·bata manderangona sokatna aro songbadrangko chapa ka·ana agreba technology aro radio-ko jakkalna nangani gimin ua talatangaha. Digital chasongo tol·gipa koborrangna mikrake dongani giminba ua agane, media-ni kamrang songsarna namgniko ra·bagen ine an·tangni ka·donganiko parakataha.

The Shillong Times-ni nokgipa Manas Chaudhuri, Salantini Janera-ni bilsi 25 ong·aniko minggni a·selrangna gisik ra·na krabegipa ong·a ine aganangaha – skanggipara Salantini Janera-an A·chik songbadrangoni bilsi 25-na baigipa ong·a, aro uko manianian a·dokni skotong minister, Opposition-ni dilgipa aro Parliament-ni Memberko damsan bakrimataha aro ian ku·mong-nangrimaniko mesokaha ine ua aganangaha.

1990 bilsirango jak king-8 gisim aro gipokchi chapa ka·aniko a·bachengaoni da·o jakbri rong gnange chapa ka·gipaona sokaha aro mikkangchi chu·gimik rong on·na chanchisamsoanirang donga ine ua aganangaha. Una agreba, MBOSE porikkao Garo subject-o mark bang·bate man·gipana bilsiantian gong 20,000 tangkarangko boksis on·na a·bachenggen ineba ua parakatangaha.

Uandake, Garo Hills-o kingsamangmang A·chikkuchi chapa ka·gipa songbad ong·e, manderangko aro sorkariko Salantini Janera-ni nangdimatani gimin ua talate on·angaha. Ia cholko jakkale an·tangtangni neng·nikanirang aro miksonganirangko parakatchina manderangna didianiko on·angaha aro ia songbad-o seatgenchimode, uan Skotong Minister-ona sokanggen ine ua aganangaha.

Na·simang iakoba nina man·gen: 

Na·simang iakoba poraina man·gen: Tura-ni Boldak A·ding L.P.School-ko CM nirokea

na·simang hubnetwork.in, oniko video-ko niangan baksa poraina man·gen.

Chingko ka·mao mesokgipa social mediarango jarikna man·gen:-

Twitter- twitter.com/nemediahub

Youtube channel- www.youtube.com/@NortheastMediaHub2020

Instagram- www.instagram.com/ne_media_hub

Download our app from playstore – Northeast Media Hub