Williamnagar, Oct 13: East Garo Hills a•jani Samanda block ning•o COVID-19-ni tikarangko chu•gimik su•mangimin songrangna Budbar salo, Meghalaya a•dokni Chief Minister Conrad K Sangma-ni jakchi mittelpilani certificate-rangko on•angaha.

Samanda block-o NRLM-ni Mega Block Event-ko a•bachengate on•angani somoio a•dokni Chief Minister, COVID tikarangko su•mangimin songrangna certificate-rangko on•angjolaha. Meghalaya a•dokni bilsi 50 gapaniko maniani bak gita ia program-ko Samanda block ong•ataha.Ia program-ko ong•atanio ua dingtangmancha Community Investment Funds-ni gita dingtang dingtang Village Organisation (VO)-rangnaba tangka paisani gita dakchakanirangko on•angjolaha. Ia tangka paisarangko self help group-rang, songo noko an•tangtangni man•dapanirangko bariatna gita jakkalanggen.Ia program-ko ong•atanio a•dokni Chief Minister, jinmana aganprakengon, me•chik dolrangko tangka paisani gita mangrakgipa ong•atna sorkari, SHG-rangna dakchakanirangko on•enga ine parakangaha.

Game ge•e cha•giparangni janggi tangani gadangko nambatatna gita sorkari kamko ka•enga ineba ua aganaha.