Tura, July 20: Budbar salo, Meghalaya a•dokni Chief Minister Conrad K Sangma, Selsella Block-ni ning•o donggipa Haripur songo M/s FEED MILL-ko kulie on•angaha aro ia FEED MILL-ko kulie on•angani somoio Rajabala-ni MLA Abdus Saleh, Selsella-ni MLA Ferlin CA Sangma aro Phulbari-ni MLA SG Esmatur Mominin-ba dongpaaha.

West Garo Hills a•jani a•kawe jolrango manderangni jilenggipa matchu/wakrangna chu•onga gita alrangko on•na man•na gita ia mill-ko kuliaha.

Ia FEED MILL-ko Meghalaya sorkarini ra•gatgipa Piggery Mission-ni ning•o a•bachengataha aro ia mill-ko IFAD-ni MLAMP Project aro Meghalaya sorkarini ning•o MBMA-ni ra•dogipa Haripur IVCS Ltd Selsella chalaianggen.

Ia M/s FEED MILL-o kontasani gisepon kg 1000 alrangko tarina man•gen.

Ia mill-ko kulina gita Meghalaya sorkarini Piggery Mission-ni ning•o gong lak 19.34 tangkarangko koros ka•aha aro iana ia mill-ko chalaienggipa dolba gong lak 21-ko chapaha.