Shillong, July 8: A•doko songdongenggipa manderangni nisenge dongenggipa Directorate of Educational Research & Training-Annexe-ko Sukrobar salo, Meghalaya a•dokni Chief Minister Conrad K Sangma, Shillong songjinmani Malki-o kulie on•angaha aro ia rikdapgipa nokko kulie on•anganio a•dokni Education Minister Lahkment Rymbui, jolni MLA Mazel Ampareen Lyngdoh, Education-ni Additional Chief Secretary DP Wahlang aro gipin official-rangba dongpae bak ra•angaha.
Ia DERT building-ko rikna gita gong kror 8.33 tangkarangko Asian Development Bank (ADB) chame on•ahachim.
Ia Directorate of Educational Research & Training (DERT)-Annexe-ko kulie on•angani somoio a•dokni Chief Minister, jinmana aganprakangengon, a•doko chu•onga gita skigiparang dongani gimin namnamgipa skigiparangkoba nangenga ine aganangaha. Ia DERT-chi chatro chatrirangko aro chadamberangko mikkangchina tarisamsoanio skigiparangna dakchakani ong•gen ineba Chief Minister aganaha.
Ia DERT building-ko kulie on•angani somoio a•dokni Education Minister Lahkmen Rymbui-ba jinmana aganprakengon, Meghalaya a•dokni chatro chatrirangba gipin a•dokrangni chatro chatrirang baksa susapana man•na gita ia DERT-ara, a•doko lekka pora on•ani gadangko tarigipa gita ong•enga ine parakangaha.
