Shillong, July 11: Shillong songjinmani Pasteur Hills-o State of the Art Diagnostic Centre-ko kulianio tangka paisarangko jakkalsretahani a•sel da•alonan kamrangko a•bachengatna man•kujaenga ine matnange seahani gimin Shillong Times songbadni kosako Shillong-o donggipa CR Projects company-ni CEO Christopher Rani, kachario ijahar ka•na gita ka•mikkenataniko on•angaha.
Rani-ni parakatani gitade, ia PPP Mode-o chalaienggipa centre-ko ia bilsini January jaon Meghalaya a•dokni Health Minister James K Sangma kulie on•angahachim aro iandake company-ni kosako matnanganiara maming pangchakani gri matnanganisan ong•aiachim.
Ia centre-na a•dok sorkari gong lak 10-kosan koros ka•engkua aro ua an•tangsa iana gong kror 4 tangkarangko koros ka•aha ineba Rani parakataha.
Shillong Times-ni reporter-rang maikai iako gong kror 100-ni project ine ma•sina man•aha ineba Rani sing•doangaha.
