Williamnagar, March 30: New Delhi-o donggipa Sikshya Barta-ni Zonal Education Media Office-ko Bristibar salo, Williamnagar-oba kuliaha aro ia office-ko kuliani somoio Meghalaya a•dokni PHE Minister Marcuise N Marak, mongsonggipa sokgipa ong•e bakko ra•angaha aro unbaksana a•dokni Education Minister Rakkam A Sangma-ba guest of honour ong•e bakko ra•angaha.

Williamnagar-o ia Zonal Education Media Office-ko District Multipurpose Socio Economic Development Organisation (DMSEDO) chalaienga aro ia office-ko kuliani somoio DMSEDO-ni general secretary James Thiumai R Sangma, ia Sikshya Barta-ni bidingo talataniko on•angengon, ia Sikshya Barta-ra songadam nokadamrango donggipa aro diltubatsranggipa biaprango donggipa manderangna bida budiko on•na gita English, Hindi aro joltangni ku•sikrangchi antio changsa ba salanti dake nakatatenggipa songbad ong•a aro ian RNI ba India sorkarini ning•o donggipa Information & Broadcasting Ministry-ni ning•o register ka•gimin ong•a ine parakataha.

East Garo Hills a•jaoba ia Sikshya Barta-ni gita songni nokni manderangna, nangchongmotgipa u•iatani aro gipin ma•sina nanganirangko on•na gita ia Zonal Education Media Office-ko Williamnagar-ni Balsrigittim-o kuliaha ineba ua parakataha.

Williamnagar-o ia Zonal Education Media Office-ko kulie on•angani somoio a•dokni PHE Minister aro Williamnagar-ni MLA Marcuise N Marak, jinmana aganprakangengon, Meghalaya a•dokko da•o bilsi bongani gisepo pilakni gitan tang•doatna gita adita salrangna skang ong•atanggipa Budget Session-o a•dokni Chief Minister Conrad K Sangma parakatmanahani gimin da•alo Sikshya Barta-ni Zonal Education Media Office-ko Williamnagar-o kulianiaba apsan miksonganion ong•enga ine parakataha.

Ia Sikshya Barta-o chadamberangni changa sapanirangkoba sandie ra•dona jotton ka•gen ine DMSEDO secretary-ni agananggipa kattarangni gimin janapatengon, chadamberang an•tangtangni changa sapanirangko mesokna cholrang dongjae tang•dona gita man•jaengachim indiba da•o Zonal Education Media Office-ko kulianichi jolni chadamberangna bang•a namgni ong•gnok ine Marak, ia media office-ko chalaienggipa dolrangko mittelpilangaha.

Iana skang, a•dokni Education Minister Rakkam A Sangma-ba ia tom•anio jinmana aganprakangengon, Williamnagar-o Sikshya Barta-ni Zonal Education Media Office-ko kulianiara jolo songdongenggipa manderangna Nokgipa Isolni pattiani ong•gen ine an•tangni ka•dongchakenganiko parakataha. Ia office-ko kulichengani somoirango adita neng•nikanirangko chagrongnaba gnang ine janapatengon, ian jolo songdongenggipa manderangna bida budiko on•na miksonge a•bachengatenggipa office ong•ani gimin aro pilakan iako be•en pil•atna gita rakbee kamko ka•ahani gimin ia kam chu•sokgipa ong•telgen ine Sangma parakataha.

Meghalaya a•doko lekka porako tang•doatna gita a•dok sorkari, Maths aro Science subject-rangko Class XII-na compulsory dake ra•gatna bakan nipilangna sienga ineba ia tom•anio Education Minister parakataha.

Iakoba poraie nina man·gen: East Garo Hills-ni NGO-rang Roster System-na chakpaaniko on•a