Shillong, June 23: Bristibar salo, Hima Nongmynsaw Syiemship-ni Langpih jolrango songdongenggipa manderangni namgnina kamko ka•enggipa Synjuk Ki Nongshynshar Shnong Nongmynsaw Syiemship (SKNSNS) dolni dilgiparang, Meghalaya a•dokni Deputy Chief Minister Prestone Tynsong-ko grongenba, sima ari jolrango songdongenggipa manderangni neng•nikanirangko namatchina didiangaha.
Ia jolrango songdongenggipa manderang ru•utbea bilsirangonin Assam a•dokni sinjetaniko man•e neng•nikanirangko chagrongna nangtokenga ine ia dolni dilgiparang, Rambrai-Jyrngam-ni MDC Banjop Pyngrope baksa Deputy Chief Minister-ko gronge, ia jolrango ong•enggipa obostarangko namatna gita ta•raken kamko ka•china didiangaha.
Deputy CM-ko grongeani ja•man kobor ra•timgiparangna talataniko on•angengon, Langpih jolara West Khasi Hills a•jani Hima Nongmynsaw Syiemship-ni ning•o ga•akgipa biaprangsa ong•ani gimin ia jolrangko Meghalaya a•dokon man•chapna nanga ine Banjop parakataha.
Ia jolrango songdongenggipa manderang bang•batan Khasi aro Garo jatrangsa ong•ani gimin Meghalaya a•dok ning•on ong•na nanga ineba ua aganaha.
