Shillong, Oct 12: Adita salrangna skang, Shillong songjinmao jingjengatenggipa skigiparangni kosako tear gas-rangko godapgipani bidingo niam gita ja·kurangko de·na Meghalaya a·dokni Home Minister Lahkmen Rymbui, ku·rachakaniko on·angaha.
“Niamko pe·gipa je manderangba ong·china chinga nanga gita ja·kurangko de·na nangao ga·akaigen. Chinga darangkoba chel·chakna ba maikoba dongnuna jotton ka·enga ong·ja ine pilakan obostako ma·sichakna nanga. Indiba ja·kurangko de·na skang chinga niamko ja·rikna nanga,” ine Rymbui, kobor ra·timgiparangna parakataha.
Jingjengatenggipa skigiparangni kosako nangana bate bilko jakkalenba, tear gas-rangko godapahani gimin UDP dolko man·chape dingtang dingtang dolrang, Home department aro a·dok sorkarini kosakoi raken jegalattokahachim ine nikna man·a.
Iani bidingo Home Minister Lahkmen Rymbui-ko kam watchina gitaba dingtang dingtang dolrang dabitokahachim.
Indake ong·engon, ia a·selni bidingo sorkari, district administration-oniko report-ko bi·ataha aro report sokbahaona niam gita ja·kurangko de·gen ine Home Minister parakataha.
“Da·o dipet district administration-ni report angona sokbakuja indiba report sokbaahaon niamo pangchake chinga nanga gita ja·kurangko de·gen,” ine Rymbui aganaha.
