Shillong, March 8: Maming a•sel aro neng•nikanirang dongjaode, bangbang dongenggipa skigiparangni biapo jasani gisepon kolgapatgnok ine education minister Shri Lakhmen Rymbui ka•dongani kattarangko aganaha. “Skigiparangni kamna rakkiangna kam ka•engaha, mamingba ja•donggaatanirang dongjaode bakbakan kamo rakkianggnok” ine Assembly sessioni sing•grikani somaio Rymbui aganaha.
Badiaba skulrangode skigiparangan dongsrangjaenga aro da•onan uarango kolgapatkujaenga, ia neng•nikanirangko namatna sorkari ta•raken kam ka•na nanga. East Garo Hillsni ge•sa skulode bilsisa gappilahaonamangba skigipaan dongkuja ine oppositionni dilgipa Dr. Mukul Sangmaba janappaaha. Indakgipa obostarangni gimin janapengon Selsela ni NPP MLA Ferlin A Sangmaba, Dadenggre jolode dam 23 skulrango chu•onga gita skigiparang dongkujaenga aro sak 184 skul skigiparangko kolgapatna nangkuenga ine aganaha.
Iarangna aganchakna nangengon ” Da•skario bang•a skulrangon skigiparangko kamo rakkiangaha indiba badiaba districtrango chu•onga gita skigiparangko donatna man•kujaenga. Ia bilsiba MTET porikkako ra•manaha aro bakbakan skigiparangko seokanggnok ine Lakhmen Rymbui aganaha.
LP aro UP skul nokrangni obostarangni gimin Ferlin Sangma aganengon, badiaba skul nokrangde matchu nolnamangba namjabatgiparangba gnang. Unigimin indakgipa skul nokrangko taridapna aro namdapatna nanganirang dongkuenga ine janapataha.
