Shillong, June 8: Budbar salo, Meghalaya a•dokni PHE Minister aro Mawkyrwat-ni MLA Renikton Tongkhar, Sngap Syiem College-ni dilgiparang baksa a•dokni Chief Minister Conrad K Sangma-ko grongenba, ia college-ko People’s College dake ra•napchina mol•molangaha.

Tongkhar-ni aganani gitade, Mawkyrwat-o donggipa Sngap Syiem College-ara South West Khasi Hills a•jao damsamangmang donggipa college ong•a aro ia college da•o bilsi 37-na jolni manderangna dangdike on•engahani gimin uni constituency-ni manderang ia college-ko tang•doatna nangniktokengahachim.

Ia college-o da•o dipet Arts aro Commerce stream-san dongkuengani gimin Science stream-koba a•bachengatna nangengaha ine janapatengon, ia college-ko People’s College dake ra•napahaode, ia college-oba chu•onga gita kam ka•giparang, dormaharang aro biaprangko man•pagnokchim ine Tongkhar parakataha.

Indake ong•engon, uamangni chief minister-ko gronge agangrikani chu•sokgipa ong•aha ineba Tongkhar parakataha.