Shillong, May 30: Meghalaya a•doko niam gri koela badingenga aro dingtang dingtang kamni tangka paisarangko jakkalsretenga ine Opposition dolni dilgipa Mukul Sangma, National People’s Party (NPP)-chi dilenggipa Meghalaya Democratic Alliance (MDA) sorkarini kosako matnanganirangko dakengani gimin, sorkarini kosako sakkirang donggenchimode, CBI ba kacharirangona re•ange niam gita ja•kurangko de•on nambatgen ine a•dokni Deputy Chief Minister Prestone Tynsong parakatskaaha.
Opposition dolni dilgipa Mukul Sangma-ni matnanganirangna aganchakaniko on•angengon, sorkarini kosako iandake matnanganirangna sakkirang dongbebea ong•ode media ba kobor ra•timgiparangni mikkango matnange dongana bate CBI ba kacharirangona re•ange niam gita ja•kurangko de•on nambatgen ine Tynsong parakataha.
A•doko niam gri dakgipa kamrangni gimin a•dok sorkari, manderangna talate on•na nanga ine Mukul-ni dabianina aganchakaniko on•angengon, MDA sorkariko songchengaonin sorkarini kosako hajalni hajal matnanganirang donga aro ia matnanganirangko sorkari dal•e ra•bebegenchimode indita hajalni hajal matnanganirangna sorkari ja•kurangko de•sokjawa ine Deputy CM parakataha.
Sorkarini kosako matnanganirangko ua dal•e ra•bebeenga ong•ode CBI ba kacharirangona re•angon kakketko ma•sina man•aigen ineba Tynsong, Opposition dolni dilgipako ra•biataha.
