Shillong, July 18: Meghalaya a•dokni SSA skulrango skigiparang, re•anggipa February jaonin jabongani dormaharangko man•tokkujaengani gimin Sombar sal dipet, Additional Secretariat sambao asonge jingjengatna a•bachengahaon, sorkarini official-rangko gronge agangrikani ja•manoba chu•ongnikaniko man•jae, skigiparang asonge jingjengatangkuna manchie donangaha.
Meghalaya SSA Schools Association (MSSASA)-ni membor-rang Sombar salo, Additional Secretary DP Wahlang-ko gronge iani bidingo agangrikangahachim indiba uni ku•rachakaniko uamang chu•ongnikjae, jingjengataniko dontongkujana manchie donangaha ine MSSASA-ni president Aristotle Rymbai parakataha.
Rymbai-ni parakatani gitade, uamang Education official-ko gronge agangrikon, skigiparangna jabongani dormahako on•na gita gong kror 44-mangko nangenga aro Education department-de tangka paisarangko watatjaenga ong•ja indiba a•dokni Finance department-onin tangka paisarangko on•atkujaenga ine Education official, uamangna talataniko on•angaha.
Rymbai-ni parakatani gitade, ia bilsini gisepo ma•mong sorkarionin tangka paisarangko a•songni pilak a•dokrangnan on•atkujaenga aro re•anggipa bilsio ma•mong sorkarini on•atgipa tangka paisarangkoba bang•bata a•dokrangan watatkujaenga ine Additional Secretary, uamangna talataniko on•angaha.
Meghalaya a•doko tangka paisani gita neng•nikanirangko chagrongna nangengani gimin skigiparangni dormahako bariatani bidingo Education department, obostarangko niengkua ineba Additional Secretary, uamangna talate on•aha ine MSSASA-ni president parakataha.
SSA skulrango skigiparangni man•na nangkuenggipa dormaharangko ta•raken chu•gimikko on•china, skigiparangni dormahako bariatchina aro a•dokni SSA skigiparangko State Implementation Society-oniko Education department-ona apjitate regularise ka•china MSSASA dabiengachim ine nikna man•a.
