Baghmara, June 20: Mikkarang dontonggija waangani ja•man South Garo Hills a•jao mongsonggipa rama jal•langrang champengatako man•na nangahani a•sel Maheskola aro uandakgipa biaprango chu•onga gita cha•ani bosturangko man•tokjaengaha ine kobor on•aha.
Koborko on•ani gitade, ia biaprangona dakanggipa ramarang champengatako man•ahani a•sel manderangni nangchongmotgipa bosturang, jekai mirong, dal, to aro uandakgipa bosturangko salbaenggipa garirang re•bana man•jaengahani gimin dokkanrangoba cha•ani bosturang bon•engaha aro dokkanrango dongtimgiparangba mirongrangko manderangna sakprako kg-prakrangsan palna man•aiengaha.
“Maheskola-o dokkan dal•kalgipa ge•sasan dongaia aro ia dokkanoba da•o bag 80-mangni gitasan mirong dongaiaha. Ia dokkanoniko Maheskola-onisan ong•aigija samba jolrango donggipa songrangoniba cha•ani bosturangko brena re•batokengani gimin ian chu•ongjawaha. Ramako ta•raken taripile on•na man•jagenchimode chinga bakan cha•ani ringani gri ong•na nangaignok,” ine Maheskola-oni saksa Sengkush R Marak, minggipa mande parakataha.
Ia jolrango diesel aro cha•ani bosturang chu•ongjaengahani a•sel Maheskola Primary Health Centre (PHC)-ba neng•nikanirangko chagrongna nangengaha ineba ua parakataha.
Batanggimin antirangonin mikkarang dontonggija waangahani a•sel Garo Hills gimikon, chi bananirangko, a•a be•anirangko aro rama jal•langrangni nosto ong•anirangko bang•en nikna gita nangaha aro iani a•sel Garo Hills gimikon manderang neng•nikanirangko chagrongna nangtokengahachim.
Maheskola-ona dakanggipa Rongara dolongko pe•angani ja•man ia jolrangba Garo Hills-oni chu•gimik champengatako man•srangahachim ine nikna man•a.
Da•o ia jolrangona cha•ani bosturangko South West Khasi Hills a•jao donggipa Nongjri-Ranikor bak gitasan ra•bana man•engachim indiba ia ramaoba re•anggipa antion mikkarang jime waangani a•sel a•arang be•dape mitam bakrangode champengatako man•angahachim.
