Ampati, June 9: Batanggimin salrangonin dontonggija mikka waangani a•sel South West Garo Hills a•jani bang•a songrangkon chi banna a•bachengaha aro badiaba badiaba biaprangode a•arangni ruronganikoba nikna gita man•aha.
Koborko on•ani gitade, mikkarang dontonggija waanganichi South West Garo Hills a•jani dam 26 songrangko chi banaha aro a•ja gimikni sak 890 manderang neng•nikanirangko man•na a•bachengaha.
Chi bananio nok te•gittamde chu•gimik nisigalakko man•aha aro te 43 nokrangba adita nosto ka•ako man•aha. Bristibar pringo mikkarang jimbee waanganichi, Betasing C&RD Block-ni ning•o donggipa Sonamati songo a•a be•dapenba mande saksa siangna nangaha ine kobor on•aha.
Rerapara C&RD Block-ni ning•o donggipa Mellim Sub-Centre-koba chi bananio nurse sakgni, sub centre-o ong•katna man•gija dongna nangahachim indiba ja•mano songni manderang, ia nurse sakgniko jokatna man•aha ine kobor on•aha.
Mikkarang jimbee waanganichi Kisanpara Dam-ba nangchakeako man•aha aro uandaken Zikzak C&RD Block aro Betasing C&RD Block-ni ning•o donggipa songrango chi bananirang bilongbatangaha ine kobor on•timgiparang parakataha.
Ampati-ona chirangko sale on•gipa pumping machine-ba nosto ka•ako man•ahani a•sel da•o dipet chiko sokate on•na man•kujanaba gnang indiba ia neng•nikaniko ta•raken namatna gita official-rang jotton ka•enga ine Ampati PHE-ni executive engineer parakataha.
South West Garo Hills a•jao donggipa dingtang dingtang songrangoni Ampati-ona dakanggipa ramarango a•arang be•anichi, bolrang be•anichi aro chirang bananichi ramarang champengatako man•aha ineba official-rang u•iataha.
Indake ong•engon, chi banenggipa songrangna district administration aro SDRF dolni manderang, pilak nanga dakchakanirangko on•na jotton ka•enga ineba official-rang parakataha.
