Guwahati, Oct 13: Dibrugarh-o sak hajalni hajal cha bagan dake cha·gipa jatrang aro Adivasi dolrang, BJP-chi dilenggipa Assam sorkarini kosako jingjengataniko dakanichi Assam-ni Salaram jol gimiko cha ge·aniko nangchakeataha.
Dam 218 cha baganrangko man·chape dam 24,000 chonchongipa cha baganrang baksana cha bijak bregipa dam 70 karkanarango kam ka·giparangba ia jingjengatanio bak re·angpaaha. Uamangni mongsonggipa dabianirangara uan Scheduled Tribe (ST)-o chapatchina, salni hajirako 551-ona bariatchina aro a·a chiagrigipa cha bagano kam ka·giparangna niamni gita a·ani bilrangko on·china dabianiko man·chapa.
Assam Chah Mazdoor Dangha (ACMS), Assam Tea Tribes Students’ Association (ATTSA), All Adivasi Students’ Association of Assam (AASAA), 36 Janajati Parishad aro Chah Jonogustiyo Jatiya Mahasabha apsan nangrimenba ia jingjengataniko ong·ataha jeni a·selan ramao garirang apchangket ong·atako man·an baksana Chowkidinghee rama bibrao sak hajalni hajal manderang tom·batokenba skulrangba chiptokna nangao ga·akaha.
ATTSA-ni President Dhiraj Gowala, BJP dol uamangni vote-kode ra·aha indiba uamangna kakket bichalkode ka·e on·jaha ine matnangataha. Iani gisepon, cha bagano kam ka·giparangde a·a chiagri dongna nangengon maina private project-nade a·arangko on·a man·a ineba ua sing·doaniko dakataha. ACMS Dibrugarh-ni Secretary Nabin Chandra Keot, uamangni ming 3 dabianirangkode nigalna man·jawa ine u·iatengon, re·baenggipa 2026 bilsini election-o vote on·giparangni gisik dingtanganiko chagrongna nangnaba donga ineba ua mikrakataniko on·ataha.
Ia jingjengataniko ong·atanio dingtang dingtang dilgiparang jekai Lazar Nanda, Ramnath Bhumji, Khagen Rajowar, Bansilal Sahu, Bimal Bagh, Deben Oraon aro Albert Oreya maangba jinmana aganprakaniko dakangaha. Gitcham Union Minister aro Dibrugarh-o chang 5 mancha MP seoka man·gipa Paban Singh Ghatowar-ba, re·jomaniko a·bachengatna skang Mancotta Field-o uni chakpaani ku·rangko on·ataha.
A·dok sorkarina sinjetaniko bariatna cha bagan dakgipa a·jarango iandakgipa re·jomanirangko ta·raken mikkangchiba ong·atangkugen ineba jingjengataniko ong·atgipa dilgiparang aganangaha.
Na·simang iakoba nina man·gen:
Na·simang iakoba poraina man·gen: Singapore-ni sak 3 NRI-rang Guwahati-ni CID Headquarter-ona re·baa
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
