Tura, Dec 4: St. Xaviers Higher Secondary School-ni Platinum Jubilee Souvenir-ko a·dokni Skotong Minister Conrad K Sangma oprake on·aha.
Ia program-ko uamangni school campus-on ong·ataha aro ia program-o, Skotong Minister Conrad K Sangma mongsonggipa sokgipa ong·e bak ra·angaha aro unbaksana school-ni gitcham aro gital chatro chatrirang aro ma·a paarangba dongpae bak ra·angaha.
Tom·anio Skotong Minister jinmana aganengon, ia ki·tapko chapa ka·na gisik nange kam ka·ahanina aro namnamgipa noksarangko on·e tariahanina Platinum Jubilee Souvenir Committee-ko de·mitele aganangaha.
Indake, jatni dakbewalrango dakmesokahanina chatro chatrirangkoba ua mitelataha.
Ia ki·tapko chapa ka·ani miksongani gimin janapengon, St. Xaviers Higher Secondary School-ni bilsi 75 gapanian, Sister Camino aro unbaksana on·kange dangdike on·gipa Sister-rang aro skigiparangni gisik nange dangdike on·anichi pilak neng·nikako chagrongoba mandesal ong·e gipinrangna dangdike on·skaaniko gisik ra·atani ong·a ine Sangma aganaha.
Meghalaya a·doko chagrongenggipa neng·nikanirangko aro man·enggipa cholrangni gimin janapskaengon, a·dokni sak lak 38 mangni gita songdong a·chaenggiparang bilsi 20-ni ning·o ong·gipa chadamberang ong·a aro uamang ia minggnioniko gisik seng·e basegenchimode, a·songko nitoatnaba man·a ba ia cholrangko ra·gija namrenggenchimode a·songko ong·siatnaba man·a ine Skotong Minister talataha.
Gamchatgipa aro nambata lekka pora skianiko on·a, a·dok sorkari chadamberangko niroke dilenga aro cholrangko ong·enga ine aganan baksa, lekka pora skianiko tang·doatna sorkarini mangsonganirangkoba ua parakangaha.
Iarangna agreba, klas 4 ba 5-ona de Khasi aro A·chikkuko bi·sarangna skie on·a nanga maina ian ku·sikko aro jatni dakbewalrangko ringpinge rakkianio dakchakani ong·gen ineba ua janapataha.
Indake, a·doko nambatsranggipa chatro chatrirangko ong·katatna dilahanina mitelpilskaangan baksa, Chief Minister’s Special Fund-ni gita School bus bolsa aro school-ni band-na doka dam·ani ostrorangkoba Skotong Minister on·angaha.
Tura Diocese-ni Bishop Andrew R. Marak-ba, bilsi 75-na kingking on·kange dangdike on·ahanina Missionaries of Christ Jesus-ni sister-rangko mitelpilskaangaha.
Sister Marline Pinto, MCJ, school-ni itihas-ko gisik ra·atpilengon, 1948 bilsio Tura-on Missionary-rang re·bae school-ko a·bachengataoni da·alona nambatsranggipa chatro chatrirangko ong·katatna tariani gimin aganaha.
Souvenir Committee-ni Convener, Madam B. R. Marak-ba, School a·bachengaoni, uamangni chu·sokanirang, chagronggipa neng·nikanirang aro pilak ong·gimin gipin kamrangchi re·baenggipa chasongrangna didianiko on·ani gimin aganangskaaha.
Ia program-o,chatro chatrirang Pirate Dance, Wangala aro Ballet Dance ba chrokmesae mesokangaha aro Jubilee-ni gitkoba ring·angaha.
Na·simang iakoba nina man·gen:
Na·simang iakoba poraina man·gen: Gital rikgipa dolongko somoi gita kam ka·anina kusi ong·aniko MLA Damanbait Lamare parakata
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
