Tura, Dec 11: Salgro salaram a•dokrango songdongenggipa manderangni jegalenggipa Citizenship Amendment Act (CAA)-ko 2019 bilsini December 11 tariko ma•mong sorkarini pass ka•draahani gimin suk ong•gijaniko mesokna gita Sukrobar salni bako North East Students Organisation (NESO)-ni membor-rang, salgro salaramni pilak a•dokrangon ‘Black Day’ ba andalgipa salko maniangtokaha.
Ia ‘andalgipa sal’-ko gisik ra•anio NESO-ni ning•o donggipa dingtang dingtang dolrang, salgro salaramni dingtang dingtang biaprango, nisan gisimko ra•e ma•mong sorkarini kosako jegalanirangko dakangtokaha aro salgro salaram a•dokrango ia CAA-ko maming dakeba ra•chakna man•jawa ine jinma jinma chrik a•boktokaha.
Meghalaya a•dokoba Khasi Students Union (KSU) aro Garo Student Union (GSU) dolrang, ia ‘Black Day’-ko manidilangaha aro ma•mong sorkarini ra•gatgipa CAA-ko ra•galpile Meghalaya a•doko Inner Line Permit (ILP)-ko ra•gate on•skachina dabiangtokaha.
Salgro salaram a•dokrango dingtang dingtang dolrangni jegalenggipa Citizenship (Amendment) Act-ko re•anggipa bilsini December 11 tarikon Parliament-o pass ka•ahachim ine nikna man•a.
Salgro salaram a•dokrango songdongenggipa manderangni jegalaniko knachakgija India sorkari, ia CAA-ko 2019 bilsini December 11 tariko pass ka•ahani gimin ia salko pangnan salgro salaram a•dokrango andalgipa sal ine gisik ra•kamgen ine NESO-ni dilgiparang parakataha.
NESO-ni u•iatani gitade, ia December-ni 11 tarikko ‘Black Day’ dake manianiara CAA-ko salgro salaram a•dokrango songdongenggipa manderang da•oba jegalengkua ine ma•mong sorkarina mesokani ong•gen.
NESO-ni ning•o donggipa dingtang dingtang dolrangara, All Assam Students’ Union (AASU), Khasi Students’ Union (KSU), Naga Students’ Federation (NSF), Mizo Zirlai Pawl (MZP), Twipra Students’ Federation (TSF), All Manipur Students’ Union (AMSU), Garo Students’ Union (GSU) aro All Arunachal Pradesh Students’ Union (AAPSU) dolrang ong•achim ine nikna man•a.
