Shillong, Feb 22: Meghalaya a•dokni bilsi 50 gapaniko maniani bak gita Shillong songjinmao taridapgimin U Soso Tham Auditorium-ko Mongolbar salo, a•dokni Chief Minister Conrad K Sangma, do•ga oe on•angaha aro apsan somoion ua pakmarango nitobee tarigipa noksarangko oprake on•angan baksana Museum on Wheels-koba a•bachengate on•angjolaha.
Meghalaya a•dokni samtangtango donggipa sam-bol aro do•o matrangko mesokna gita pakmarango nitobee taritilonganina Arts & Culture department-ko mittelpilangengon, ian ia biapko nitobatatanisan ong•aigija gipin biaprangoni re•baenggipa manderangko salbana aro a•dokni gimin ma•siate on•na dakchakaniba ong•gen ine Chief Minister parakataha.
U Soso Tham Auditorium-ara dingtang dingtang program-rangko sokachakna gita mongsonggipa biap ong•genchimoba ru•utbea bilsirangna taridapanirang dongkujaengachim ine janapatengon, da•o ia auditorium-ko nambate taridapna man•ahani gimin ian a•dokna mikkim rasongni ong•engaha ine Sangma aganaha.
Tura, Jowai aro gipin a•jarango donggipa auditorium-rangkoba apsan daken da•o taridapengaha ineba Chief Minister parakataha.
Chief Minister-ni parakatani gitade, Shillong songjinmani Mawdiangdiang-o rikenggipa Shillong International Centre of Performing Arts & Culture (SICPAC)-koba da•o matchotna siengaha.
Meghalaya a•dokni bilsi 50 gapaniko maniani bak gita changgipa sapgipa chadamberangna sorkari, dingtang dingtang program-rangko tarisoahaoba COVID-19-ni a•sel ong•atna man•jaha ine an•tangni suk ong•gijaniko parakatengon, changgipa sapgipa chadamberangna cholrangko on•na gita sorkari, Arts & Culture-ko tang•doatna jotton ka•gen ine Chief Minister, ku•rachakaniko on•angaha.
State Central Library aro a•dokni gipin biaprangkoba an•tangtangni gam-jin gitan jakkalchinaba ua a•dokni manderangko didiangaha.
Ia tom•anio a•dokni Chief Minister aro dingtang dingtang dilgiparang, Meghalaya a•dokko man•ani aro jatni daka rikanio nangchakegipa dingtang dingtang ki•taprangkoba oprake on•angjolaha.
