Guwahati, March 27: Sakgipinni kosako chonnikani kattako aganani mamlao, Te Rahul Gandhi-ko Lok Sabha-ni membor ong·aoniko ra·galani gimin Assam-ni dol 11 assembly-ni warachakgipa dolrang, Congress dolni dilachini mija Robibar salo Sankalp Satyagraha-ko chong·motan, jingjengataniko Assam-ni skotong songjinmao ong·atangaha.
Congress dolni jingjengatani somoio, assembly-ni dolgipin mongsonggipa warachakgipa dol aro Badruddin Ajmal-chi re·dilenggipa All India United Democratic Front (AIUDF) dol indake ong·oba, jingjengatanio bakko ra·angskajaha.
Warachakgipa dolrang nangrime jingjengataniko dakani bidingo, Assam Pradesh Congress Committee-ni padot, Bhupen Kumar Borah-ni koborna aganangani gita, a·songni niam-bidik aro democracy-ko bon·atna gita BJP dolni jotton ka·angkuani kosako jegale warachakgipa dolrangni nangrime jingjengatanirangko dakenggipa programme-rangni bak gita ia satyagraha-ko ong·ataha ine parakataha.
Te Rahul Gandhi-ko Lok Sabha-ni membor ong·aoniko ra·galani kosako Assam assembly-ni gimik dol 11 warachakgipa dolrang ku·cholsan ong·e Te Rahul-ko rimnappilkuja dipet Assam a·doko re·baenggipa salrangoba jingjengataniko dakangkugen aro AICC-ni dilgiparang Assam-ona re·bae manderangna aganprakanggen ine Borah parakataha.
Congress-na agreba, dolgittam left party-rang, Assam-ni Trinamool Congress, Asom Jatiya Parishad, Akhil Gogoi-ni re·dilenggipa Raijor Dal, NCP, Rashtriya Janata Dal aro Aam Aadmi Party-rangba mija Robibar salo satyagraha-ko Guwahati-o ong·atanggipao bakko ra·angtokaha.
Knasoani gitade, ia jingjengataniko bilakdapatna gita re·baenggipa bilsio Lok Sabha-na eleksinko ong·atnasienggipaoba Congress dol jingjengataniko dakna jotton ka·angnasienga.
Iakoba poraie nina man·gen:Pekatgipa bosturangko badingsrukgipa Khasi Hills-oni sakgittamko rim·a
